تاريخ علم النفس

 تاريخ علم النفس..

بص يا صديقي..

علم النفس في العموم أصله فلسفي ودا من منطلق الحكمة القديمة اللي كانت في مطلع فجر عصور الحكمة اللي بتقول الفلسفة هي أم العلوم.. وبداية أم العلوم بدأت من سؤال أي هي النفس تكوينها واصلها والذي منه عمومًا.. ومن هنا نستنتج إن السؤال دا هو ابوها.

علم النفس كفلسفة بدأت مع الإنسان البدائي.. وكان قديمًا بيُعتقد إن النفس إنسان داخل إنسان.. 

بعيد عن المعتقد دا كانت النظرة الفلسفية الشاملة عمومًا في الإطار دا كان التحليل النفسي ودا كان الهدف منه فهم حياة الروح واللاوعي 

وبما إننا هنتكلم عن تاريخ علم النفس يبقا لازم تعرف إن علم النفس بدأ قبل الميلاد بكتير يعني حوالي قبل 500 سنة قبل الميلاد تقريبًا..

عمك افلاطون اللي عاش قبل الميلاد ب 3 قرون كان بيعتقد إن الروح جزء منفصل عن الانسان وعن الجسد وحر طليق.. بينما ارسطو كان معتقد إن الجسد والروح واحد بس كان شايف انها بتتقسم لنصين.. واحد مرتبط بالجسم بشكل متين وواحد حر يقدر يمشي لما يجض من الجسم.. 

افلاطون هو صاحب فكرة النظرة المزدوجة للإنسان او بصيغة تانية ازوداج الرؤية واللي باختصار بتتكلم على إنك تشوف نفس الحاجة بصورتين مختلفتين عن بعض في بعض الأحيان وفي حالات بتوصل لمعظم وقته

في العصور الوسطى ما بين سنة 500 ل 1500 ميلاديًا ارسطو وافلاطون كانوا في ليفل تاني من الشعبية والعظمة ودا كان بالنسبة للكنيسة تحديدًا.. 

الكنيسة في المجتمع ككل انحازت لأفلاطون من باب التمييز بين الجسد والروح بس خدت قصة الروح دي لقدام سيكا.. طبعًا من منطق معتقد الأديان عمومًا اللي بيتكلم عن مصير الفرد ما بين الجنة والنار او الجحيم حسب لفظ الكتاب المقدس.

في الفترة دي برضو فضل علم النفس جزء من الفلسفة وفضل متأثر بيه بشكل وثيق.. وفضل على الوضع دا لحد ما جاتله يد العون في عصر النهضة ودا كان آخر جزء في القرن الـ 16 وساعتها وجهة النظر المتطورة قالت إن الروح والجسد واحد في نظرية شهيرة تسمى الأحادية..

الأحادية يا صديقي لو متعرفش أي هي فهي: نظرية فلسفية تقول أن الأشياء المتنوعة الموجودة في الكون تتكون من مادة واحدة..

والنظرية دي خلت علم النفس حاجة سهلة شوية من حيث الدراسة والتفكير.. وكان تأثيرها في النطاق دا أننا نبص لروح والجسد على انهم مرتبيطن ببعض ارتباط وثيق وان الروح جزء من الجسد اوهما واحد بصيغة تاني ودا خلى الدراسة من حيث السلوك البشري سهل حبتين

في منتصف القرن الـ 17 واحد اسمه جون لوك ودا يا صديقي فيلسوف تجريبي ومفكر سياسي إنجليزي.. المهم عمك جون اتخانق هو الرجالة بتوع علم النفس التجريبي مع الناس وقال المعرفة الحقيقية لا يمكن الحصول عليها إلا بما نعرفه وليس من خلال التفكير والعقل..

العلم الحقيقي يشباب بناخده من خلال اللي نقدر نشوفه ونلاحظه ودا الأساس اللي بناء عليه اتحط العلوم الطبيعية زي الكيمياء والفيزياء والذي منه..

في القرن الـ 18 أنشا فرانسيس بيكون دراسة جديدة للعلم وهي دراسة الطبيعة بشكل مباشر من خلال التجربة والملاحظات بالعين.. ودا بالمناسبة الملقب بأب التجربة، وهو صاحب معتقد "طريقة البحث الوحيدة الممكنة يجب أن تعتمد على إبقاء عين المرء مركزة بشدة على حقائق الطبيعة والسماح لها بتقديم نفسها كما هي". ودا كان ليه فضل كبير أنه يخلي علم النفس علم منفصل لوحده.

فيلهلم فونت.. 

في نهاية القرن الـ 19 تم تأسيس علم النفس كموضوع وعلم منفصل بعد ما أنشأ عمك فونت اول مختبر نفسي في لايبزيغ ودي مدينة المانية بالمناسبة. المهم المختبر دا كان وظيفته دراسة العمليات النفسية الأساسية زي المشاعر والأحاسيس والوعي والعواطف والكلام دا.. وبالتالي أُطلِق عليه أبو علم النفس وكان عمك فونت دا بيعتقد اننا نقدر ندرس الظواهر دي بشكل مباشر من خلال مصطلح شهير اسمه الاستبطان ودي مشتقة من كلمة لاتينية مش عارف انطقها بس معناها النظر او المراقبة وإبلاغ التجارب الخاصة بالفرد نبص كدا للإنسان ونراقبة ونشوفه حزين بقا هل دا متخزوق ولا هو وشه مكشر خلقه ولا حكاية لوية بوزه دي أي.

التحليل النفسي.. ولما تقرأ او تسمع كلمة تحليل نفسي لازم تقف انتباه لعمك فرويد. لإن دا الراجل اللي نظرياته كانت سبب كبير في بناء التحيليل النفسي وهو صاحب التحليل نفسي ومرلف كتاب “تحليل نفسي” لـ “سيغموند فرويد" 

وبما اننا جبنا سيرة النظريات يبقا لازم نقول ان اول نظرية نفسية شاملة كانت في ثمانينيات القرن التاسع عشر

بص عمك جوزيف برجر كان مهتم بالأعراض الهيستيرية وكان شايف ان الأعراض دي نتيجة كبت وخوازيق كتير والم مدفون جواك، وكان شايف ان ممكن التجارب اللاوعية تكون واعية لو عملنا مقابلة مع المتخزوق دا ونيمناه مغناطيسيًا ونقوله يبني دا مكنتش بتحبك وانت حلو بسمسم ونقعد نمعلشه بقا علشان يتخلص من الأعراض دي من خلال الاستجابة للمشاعر المكبوتة والعملية دي سماها "التنفيس او التنقية"

في بداية القرن العشرين عمك سيغموند فرويد قعد يدور ويطور ويدرس في النظريات بتاع التحليل النفسي دي وكان التحليل النفسي يدرس حياة الروح اللاواعية كهدف من دراساته، ولكن لدراسة الحياة الروحية يجب أن يكون لدى المرء إمكانية الوصول إلى العمليات الروحية.

عمك فرويد استخدم عملية او نظرية الاستبطان اللي قولنا عليها من شوية فوق كطريقة بحث ليه.. وطور طريقة مختلفة علشان يوصل للذكريات المكبوتة دي وهكلمك في النقطة دي شوية بس اخلص كلامي هنا الأول..

كان فرويد صاحب عقيدة أنه يمكن للمرء أن يكتسب نظرة ثاقبة لهذه الصراعات من خلال ربط المريض بحرية من تجارب حياته. 

علشان كدا طور طريقة الارتباط (التداعي) الحر اللي الأفلام هرسوا أمها ورسخوها في عقولنا.. يركض على شزلونج والدكتور يقعد قدامه بس بعيد شوية وأحكيلي يبني وكان شايف ان الموضوع دا مصدر مهم للعقل الباطن انه يسيب المريض يدور في اعماقه وكأنه بيفضفض لنفسه وكان شايف ان المشاكل لو تم طرحها في الوعي اثرها النفسي بيخف.

وهو في تجارب الاستبطان دي اكتشف إن المرضى عندهم مقاومة داخلية لتذكر الذكريات المكبوتة وقال اننا مجهزين بآليات دفاع زي تقنيات النفسية اللي بتحمينا من القلق والألم في العقل الباطن فشايف ان الخازوق بياجي ومعاه رجالته بحيث يمنعوك انك تتعافى منه ولا حاجة..

التجارب بتاع عمك فرويد ساهمت في تطوير نظرياته وكان أساس النظريات دي هي مسألة او أطروحة زي ما بيقولوا عليها حول الدوافع وتحديدًا أهمية الدافع الجنسي للنفسية

وتم الاحتفاظ بنظريات فرويد بواسطة اتباعه والجدير بالذكر إن انجب تلاميذه واشهرهم هما اللي انفصلوا عنه..

"كل اخوانك باعوك يا بوحة" التلاميذ اللي انفصلوا عنه كان على رأسهم الفريد أدلر وكارل غوستاف يونغ، وكارين هورني ، وآنا فرويد وإريك فروم ، انفصلوا عن فرويد وابتكروا اتجاهاتهم الخاصة.

قبل بس ما اتنقل النظرية الديناميكية حابب اقولك ان علم نفس الجريمة عنصر أساسي فيه عمك المخضرم الجامد تنين المحنك كحك فرويد. ودا اللي قولتلك هأجله كمان شوية وقررت حاليًا آجله لمقال لوحده.

طبلنا للراجل خلاص؟ خلاص طبلنا خلاص.. نخش بقا على الديناميكية ودي مش مشتقة من الديناميكا بتاع الرياضة اللي بتعض العيال بتاع ثانوي لا.. دي حاجة تاني ولما نجيب سيرة الديناميكية مربوطة بكلمة نظرية تحت راية علم النفس يبقا لابد نرفع القبعة لعمك إريك إريكسون.. بس برضو متنساش تسلم على سيغموند بيه فرويد باشا..

بص النظرية الديناميكية نشأت من تفكير سيغموند فرويد، بس لأجل الحق المصادر بتقول إنهم اعتقدوا إن فرويد كان حاطط شوية تركيز صغننين في التركيز على العوامل الاجتماعية وفهم السلوك البشري كان مهتم بالدوافع الجنسية.. وعلى فكرة هتلاقية نطلك بقوة في علم نفس النمو.. تدري ليش؟ لإنه علم ليه علاقة بالجنس برضو وفرويد دا كان راجل قليل الأدب ويحب الحاجات العيب اساسًا ووسع بقا علشان الناس دي فسدت اخلاقنا وعطلاق نيااااااع 

اريكسون.. كان يعتبر محور تطوير علم النفس الديناميكي من خلال النظرية بتعته اللي بتقول ان الشخصيات بتتشكل على مدار حياة الفرد من 8 مراحل فقط لا غير

المرحلة 1 (0-1.5 سنة) - إنشاء الثقة الأساسية أو عدم الثقة

المرحلة الثانية (1.5 - 3 سنوات) - الاستقلال أو العار والشك

المرحلة 3 (3-6 سنوات) - المبادرة أو الذنب

المرحلة 4 (6-12 سنة) - الاجتهاد أو الدونية

المرحلة 5 (المراهقة) - الهوية أو الدور الصراع

المرحلة 6 (البلوغ المبكر) - القرب أو العزلة

المرحلة 7 (منتصف البلوغ) - الإنتاجية أو الجمود

المرحلة الثامنة (الشيخوخة) - النزاهة أو اليأس

نخش بقا على السلوكية

في القرن العشرين واحد اتنطح من قرن ثور و...

اسف اسف دي حدوته تاني.. في القرن العشرين مكنش فيه اتفاق خالص على أي اللي المفروض علم النفس يدرسه.. والموضوع دا كان نوعًا ما عامل احباط من حيث مدى قصر التحليل النفسي في فهم النفس البشرية.. وكانوا بقا بيلقحوا على فرويد وبيقولولك الاستبطان كأسلوب بحث مش علمي ومش مناسب لاكتساب المعرفة عن الروح ولازم يكون ليك طرق موثوقة أكثر من كدا بحيث نعرف نوثقه، والراجل بتاع الاستبطان دا هباد وعاوز يتربى.. 

ملحوظة "المقطع الأخير دا من عندي"

في المجال دا من العلوم يا صديقي تم تطوير السلوكية عِندًا واحتجاجًا على عقيدة الروح والتحليل السلوكي من أجل الحصول على وصول موثوق إلى المواد المراد دراستها، أعاد علماء السلوك تحديد هدف الدراسة النفسية من عقيدة الروح إلى عقيدة السلوك.. 

السلوكيين الأوئل كانوا معجبين ومفتونين وسيمب لو اعتبرنا لفظ الوضعية على انها انثى.. كانوا معجبين قوي بالوضعية المنطقية..

ولو متعرفش أي هي الوضعية المنطقية فهي فلسفة علمية تطورت في عشرينيات القرن الماضي بين أعضاء ما يسمى بدائرة فيينا.  

ولو متعرفش أي هي دائرة فيينا أو حلقة فيينا: فهي حلقة مكونة من مجموعة من علماء وفلاسفة كانوا بيجتمعوا في عشرينيات وثلاثينيات القرن العشرين في جامعة فيينا وبالمناسبة الجامعة دي في النمسا وبالمناسبة تاني البرت اينشتاين كان من ضمن الحلقة بتاع فيينا دي..

الحلقلة دي عمومًا كانت بتسعى لتطبيق قواعد العلم الوضعي والمنطق على الفلسفة وعلشان متوهش مني فعلم الوضعي هو واحد من الفلسفات اللي بتستند على رأي ينص على التالي "في مجال العلوم الاجتماعية والعلوم الطبيعية فإن المعرفة الحقيقية هي المعرفة التي تُولد من رحم البيانات المستمدة من التجربة الحسية" يعني لازم يكون في تجارب وملاحظات على هذه التجارب نكون شايفينها بنفسنا وقدامنا كدا

وكان من أبرز أعضاء حقلة فيينا: موريتز شليك (1882-1936) ، رودولف كارناب (1891-1970) وفيليب فرانك (1884-1966)

إيفان بافلوف

بافلوف يا صديقي هو منشئ نظرية التكييف الكلاسيكي. تعالى اما احكيلك

كان إيفان بتروفيتش بافلوف (1849-1936) أحد أوائل علماء السلوك، وكانت مساهمته في المقام الأول لوصف التكييف الكلاسيكي كنموذج تعليمي.

بافلوف في العموم هو عالم فيزيولوجيًا ولو متعرفش أي هي الفيزيولوجيا فهي علم وظائف أعضاء الانسان: والعلم دا عمومًا بيهتم بدراسة الوظائف الكيمياوية والحيوية الطبيعية والميكانيكية للبشر وطبعًا الانسجة والأعضاء الإنسانية وغيره.. المهم بافلوف اكتشف إن الكلاب اللي كان بيجرب عليها لعابها كان بيسيل لما كانوا بيشوفوا الناس ماشيين في الممر بالأكل بالمناسبة الكلام دا اتكلموا عليه باستفاضة اكتر في كتاب كيف تصنع العواطف بنفس المثال دا الكتاب كان بيتكلم عن ان العواطف يتم خلقها لا تحفيزها وازاي تقدر تتحكم فيها وتفهمها وتميز بينها ...ألخ 

المهم الاكتشاف بتاع لعاب الكلاب دا أنتج لينا تجارب منهجية بتين إننا ممكن نخلي لعاب الكلاب تسيل عن طريق محفزات تانية.. يعني يربط أحداث تاني بالأكل فيدي نفس النتيجة بدل ما الكلاب تشم ريحة الأكل تسمع صوت الجرس اللي بيدل إن الأكل جي والموضوع دا أعطى نتائج مبهرة فعلم العواطف عمومًا وشغل عالي نتكلم فيه بعدين المهم ..

ريحة الطعام في التجارب سموها رائحة الطعام المثير غير المشروط.. وسيلان اللعاب اتسمى سيلان اللعاب للاستجابة غير المشروطة (UR). وبدأوا يدقوا الجرس في كل مرة يقدموا الأكل لحد ما أصبح الصوت دا مربوط بالأكل وخلوا الصوت باسم المحفز الشرطي بيرمز له ب "BS" وسيلان اللعاب اسمه الاستجابة المشروطة.. الكلام دا هتحتاجوا اكتر لما تدرس علم النفس بشكل منهجي دا اللي بحاول اقدمهولك من خلال السلسلة دي.. المهم ادعيلي انت إني اتجوز الكراش... هي في علم نفس وكتبها بتساعدني وانا هساعدك وجوازي منها هيحسن نفسيتي ويخليني انتجلك اكتر وكلام كتير كدا.. وبعدين انت مش هتخس مبتديش دعوات من لحمك ادعي وخلاص.

السلوكية.. وحينما نلفظ هذا اللفظ نتذكر جون برودس واطسون عالم النفس الأمريكي ومؤسس المدرسة النفسية المعروفة بالسلوكية وتقدر تقول كدا بقلب جامد ان واتسون قدر يطور نموذج بافلوف للإستجابة التحفيزية من التطبيق على الاستجابات الفسيولوجية إلى التطبيق على كل السلوك. 

كان مفكر إنه يقدر يتنبأ بالسلوك لو تعرف المنبه بتاعه.. والمنبه دا مش المقصود بيه المنبه اللي بتعمله علشان تعمل تسعين غفوة وتتأخر على معادك طبعًا. 

هو كان شايف إنك تقدر تستنتج أي هو المنبه الخاص بالسلوك لو تعرف الاستجابة بتعته.. وكان حريص جدًا على تطبيق المفاهيم بتعته دي على تنمية الأطفال وتحديدًا النمو العاطفي.. كان راجل حساس قوي واتسون دا..

وطبعًا واحدة من أشهر تجاربه اسمها البرت والفأر.. والفأر دا القارض اللي القطط بتجري وراه مش حالتك المادية المهم التجربة كانت قايمة على ما يُسمى بتكييف بافلوف الكلاسيكي.. 

بص فكرة التجربة انه يحصل صوت عالي ورا البرت كل مرة يشوف فار أبيض ومع الوقت اصبح البرت بيخاف من الفيران حسبي الله ونعم الوكيل في يا واطسون وانا اللي بقول عليك مرهف المشارع طلعت سيكوباتي يبنالموكوسة.

الخوف دا مكنش مربوط بالبرت بس لا كان على الحيوانات التانية عادي وكان واطسون شايف ان الرهاب عند البالغين اتطور بنفس الطريقة..

تولمان.. لا أنا نطقته صح التاني بالكاف اللي هو بنشرب فيه ماية دا وأكيد أنا مش الدغ في كيبوردي علشان أقول على الكولمان تولمان..

سيبك من العبط اللي بقوله دا خلينا في المهم.. في ثلاثينيات القرن الماضي.. تغيرت السلوكية بشكر كبير كحك أكبر من كحك الثانوية العامة.. من ناحية التجريبية والنظرية..

التجارب النفسية كانت بتتعمل في المعامل الحيوانية.. نموذج التكييف الكلاسيكي البسيط بتاع بالفوف اتوسع شوية تحديدًا مع فراز اللعاب في الكلاب، عمك واتسون خاد بعض التمديدات لنموذج التحفيز والاستجابة لجميع الإجراءات البشرية لمراعة العواقب على السلوك..

مع سطوح ضوء علماء السلوك الجديد جا معاهم شوية تعزيزات لمفاهيم السلوك وانقراض السلوك.. وكان من أهم العلماء دي إدوارد سي تولمان وكلارك إل. هال.

عمك ادورد سي تولمان كان مشهور بتطويره لمصطلح "متغير متداخل" او متغير وسيط

بص يا صديقي في البحث العملي هتلاقي حاجة اسمها المتغيرات.. دي غير اللي نعرفها في البرمجة وبرامج الاكسيل طبعًا..

المتغير عمومًا هو خاصية نقدر نقيسها وقيمتها بتختلف من فرد الى اخر ومن مجموعة للتانية باستخدام مستويات قياس او "متغيرات ونحطلها اسم"

هقولك الكام نوع من المتغيرات دي بسرعة ومنهم المتداخل دا بحيث تكون لاقط معي الدنيا.

1- المتغير المستقل: ودا اللي بيتقال على اسم العوامل المثيرة ودا اللي بنعتبره المؤثر الرئيسي في الظاهرة او السلوك اللي المفروض العالم او الباحث بيلاحظه اللي بنلاحظه دا بقا يمعلم اسمه المتغير التجريبي ودا اللي بيكون نتيجة المتغير المستقل.. سهلة اهي. وطبعًا قيمته بتتغير بقيمة المستقل.

طبعًا في متغير تاني اسمه المتغير التابع.. ودا في بينه وبين المستقل معرفة قديمة كدا.. ازاي؟

هقولك.. في بينهم علاقتين

أ- علاقة منقطعة ودي قايمة على البحث في وجود او عدم وجود تأثير للمستقل على المتغير التابع

ب- علاقة مستمرة ودي الباحث بيدرس فيها مدى تأثير المتغير المستقل على المتغير التابع ودرجاته... الخ

عندنا متغير تاني بقا اسمه المتغير الوسيط.. ودا اسمه متغير مستقل درجة تانية: يعني الباحث بيقوم بتغيير المتغير دا علشان يشوف مدى تأثير المتغير المستقل على المتغير التابع يعني بيدرس إذا كان المتغير بيزيد ولا بيقل من أثر المستقل على المعتمد

عندنا تاني بقا المتغير المثبت: ودا المتغير اللي الباحث بتحديده وإلغاء أثره على المتغير المستقل ودا علشان يقدر يدرس أثر المتغيرات الوسيطة..

وعلشان يعمل كدا لازم يقوم بخطوتين.. مرة بيلغي أثره خالص.. ومرة تاني بيساوية في المجموعات التجريبية قيمة واحدة ويطبقها على الكل وأهم خطوة بعد دا.. العشوائية في اختيار العينة..

أخيرًا وسبب كلامنا المتغير المتداهل.. ودا المتغير اللي بيأثر في الظاهرة اللي بيدرسها الباحث بس ميقدرش لا يلاحظها او يقيسها لكن نقدر نستدل على وجوده عن طريق قياس المتغير التابع ودا عن طريق تأثيره في المتغيرات المستقلة والبسيطة..

المتغيرات المتداخله ليها شوية خصائص كدا:

1 – المتغير التابع هو متغير فكري، عكس باقي المتغيرات فهي متغيرات إجرائية

2- في البحث العلمي مبنشفوش لا ملاحظة ولا تأثير بنستدل عليه 

3 - نقدر نستدل على وجوده عن طريق تأثيره في المتغيرات المستقلة والبسيطة..

4- تأثير المتغير المتداخل على المستقل يعتبر تأثير غير مباشر ويعتبر المتغيرات الـ 3 الأولى بمثابة مدخلات والمتغيرات المعتدة بمثابة مخرجات والمتغير المتداخل بيقف في النص بينهم 

ازيدك من الشعر بيت في المتغير المتداخل واللي زي ما قولنا كان عامل غير ملحوظ..

المفروض ان العامل الغير ملحوظ (O) هيشرحلنا ازاي ممكن السلوك (R) يحصل كنتيجة لـ التحفيز (S). ودا النموذج بتاع عمك ادورد. S - O - R حيث كان المتغير المتداخل هو O الذي يمثل الكائن الحي. 

تولمان استخدم الفيران كحيوانات تجريبية في المختبر وكان بيدربهم يلاقوا فتحة خروج في متاهات كان عاملها ومن خلال التجارب دي طور نظرية "الخرائط المعرفية" ودي النظرية اللي فسرت لي الفار بياخد زمن أقل في كل مرة بيكرر التجربة عليه في المتاهة 

الظواهر الأخرى التي يمكن تضمينها في O هي التوقع والحافز والمعرفة وما إلى ذلك.

 ومن هنا تقدر تقول بقلب مرتاح ان تولمان كان أصل السلوك المعرفي ولاحقًا في علم النفس المعرفي.

عمك "كلارك ليونارد هل" حبيب الكل، بنا نظرية صارمة للتعلم تعتمد على النماذج الرياضية ورسخ مفهوم التعزيز في تقليل الحاجة الفسيولوجية. ودا اللي كان بيتكلم عن الأكل المعزز البروتينات والحاجات بتاع كمال الأجسام والذي منه.. كان بيوضح في ابحاثه لي بنحب ناكل النوع دا من الأكل.."

وعمل نمذوج موسع بيشمل احتياجات بيحتاجها الفرد غير الاحتياجات الفسيولوجية.. طبعًا اتفقنا ان فسيولجولي مصطلح بيتكلم عن الحاجات الخاصة بالجسم.. المهم في النمذوج بتاعه كان حاطط الاحتياجات الاجتماعية زي الصداقة، الاحتياجات الثقافية زي الأدب والموسيقى، الاحتياجات الفكرية سواء العاب زي الشطرنج او مشاكل نحلها عمومًا، المعلم "هل" دا كان مميز جدًا في الرياضيات في نظرياته، وكان معتقد أننا نقدر نحسب الميل للتصرف في موقف معين عن طريق الرياضة عن طريق قوة الحافز ومدى سرعة رد فعل الشخص وعدد مرات تكرار الإجراء

(بما أن المثلث ا ب ج يساوي المكعب ا ب ج د بالتقابل بالرأس إذًا البنت دي هتخزوق الواد دا وهيكتئب فيقطع شرايينه بناء على انها خزوقته في العيد بدل ما تقوله كل سنة وانت عيدي يا ارنوبي. والحافز لقطع شرايينه هنا انه كان نفسه حد يقوله يا ارنوبي في العيد)

كان شايف انه يقدر يقيس مدى احتمالية حدوث الأجراء عند حدوث تحفيز وممكن يكون الحافز دا انه يشوف سندوتش شاورما من عند الراجل اللي على أول الشارع عندنا دا.

لكن علشان المعادلة بتعته دي تشتغل كان محتاج لقوة دافعة مش كهربية بقا من بتاع الفيزياء لا قوة دافعة سماها "القيادة" وطور "محركات" مختلفة لأفعال مختلفة (الأكل ، وممارسة الجنس ، والجري ، وما إلى ذلك) بناءً على الحوافز الموجودة (على سبيل المثال الجوع).

تم قبول نظريات هال في البداية بشكل جيد بين السلوكيين ، لكنها سرعان ما فقدت تأثيرها مع ظهور نماذج أخرى وأكثر قبولًا. (أحسن أنا اصلًا مبحبش الرياضة)

بورهوس فريدك سكينر (1904-1990) أكثر علماء السلوك تأثيرًا .

عمك سكينر كان فيه بينه وبين واتسون اللي رسم عواقب السلوك في نموذج التعليم، كيمياء نوعًا ما لكنه اختلف عن واطسون في انه جذب الوعي والحاجات التانية اللي منقدرش نلاحظها في النموذج زي الأفكار والمشاعر اللي سماها "الأحداث الخاصة" وعلى عكس علماء السلوك الجديد لم ينسب إلى هذه الظواهر دور أسباب السلوك... لا دا اعتبرها ظواهر فيزيائية لازم نفهمها بشكل منفصل وبنفس الآليات التفسيرية زي السلوك العام كدا

طور سكينر الاتجاه الفلسفي وتحديدًا السلوكية الراديكالية وكان رائدها واتكلم عنها في كتابه "فلسفة علم السلوك" ولو متعرفش أي هي السلوكية الراديكالية فهي علم بيعتقد إن دراسة الحيوان هيجبلك عائد علمي أكبر من دراسة الانسان مع التركيز القوي على البيئة كمسبب للسلوك والتركيز على العمليات المشاركة في تعديل السلوك..

بص السلوكية الردايكالية مش شايفة ان الكائنات الحية صفحة بيضاء سلوكها مبيتأثرش بالمؤثرات الجينية والبيولوجية، ببساطة كدا هو كان شايف ان العوامل القابلة للاختبار بتلعب دور رئيسي في تحديد سلوك العديد من الكائنات الحية والمعقدة وان دراسة العوامل دي بمثابة مجال رئيسي في مجال البحوث.

واحدة من اهم المساهمات اللي خدها اسكينر في الراديكالية انه اتخذ نظرية تشارلز داروين الا الناس سابو كل حاجة فيها ومسكة انه جدهم الأول كان قرد، اسكينر خاد نظرية التطور بتاع داروين كنقطة انطلاقه ليه. حيث يحدث التطور عن طريق اختيار الجينات بحيث تكون الخصائص والسمات في الأفراد هي الأكثر ملاءمة لبقاء النوع..

اسكينر خاد النظرية دي ونقلها لاجابة سؤال كيف يتأسس السلوك وتطويره.. من خلال حاجة سماها "اختيار السلوك من خلال نتائجه". والعواقب والظروف اللي كان بيحصل فيها السلوك دا سماها "شروط التعزيز".

هل مساهمات سكينر خلصت لحد هنا.. لا طبعًا سكينر قدم مساهمات مهمة جدًا في فهم اللغة وتحليله اللغوي في عام 1957 في كتاب السلوك اللفظي حيث يحلل معنى الكلمات كسلوك يتم تأسيسه من خلال شروط التعزيز... كل السلوك الذي تم الحفاظ عليه بواسطة المعززات بوساطة أشخاص آخرين، دعا السلوك اللفظي. وبالتالي، كان السلوك اللفظي هو كل السلوك الذي يؤثر على الآخرين، وليس مجرد الكلام.

تسألني لي كتبتلك دا بالفصحى والباقي عامية؟ سؤال حلو، الاجابة بتفزلك مش حوار يعني.

في معمل الحيوانات، حيث أجرى تجارب دقيقة ومضبوطة جيدًا على الفئران والحمام، استخدم "صندوق سكينر". ودا كان عبارة عن صندوق برجلين مربعة تقدر تحركها شغالة كرافعة يعني ودي كانت معمولة للأكل اللي الحيوانات كانت بتدرب على تشغيله "الصندوق" ودا كان قادر على دراسة عدد لا يحصى من الاختلافات في العلاقة بين استجابة الحيوان والمعززات

عمك اسكينر كان افيد من اسكينر الطابعة بتعتي فقد كان مناظرًا اجتماعيًا نشطًا، ودا تشوفه سنة 1948 في كتاب Walden Two اللي كما وصفته مصادري والعسس الخاص بي والعسس هنا معناها جواسيس الحاكم "النقاش الأكثر شمولًا" ودا كان بيصف فيه المجتمع المثالي.. ونحط خطين تلاتة على حرف الألف وأوعى تشيله الدنيا قلق اليومين دول والناس هتموت وتشيله.. المجتمع المثالي دا كان منظم بحيث يكون كل أعضاءه عايشين حياة كويسة من أجل إرساء المسؤولية الجماعية ومنع الأنانية بين السكان، معناها حلو فكتبتها بصيغة حلوة.

الأطفال بيتم تربيتهم على يد جماعة مش داخل حدود الأسرة الضيقة وكل واحد يربي ابنه بطريقته واللي مربي معزة يربطها وابني يعمل اللي هو عاوزة والذي منه من العته اللي بيحصل في شارعنا حسبي الله في دي جيرة.

بيتم مكافأة الأشخاص في المجتمع وفقًا لنظام معين.. يعني المهام الجذابة اللي تشدك تعملها مكافأتها قليلة وكل ما كانت المهمة مش على كيف الانسان كل ما كان مكافئتها نضيفة شوية.. علاقة عكسية يعني.. ودا عمل حاجة حلوة.. خلى المهام اللي مش جذابة أصبحت جذابة من أجل المكافأة وطبعًا دا عكس الطبيعي.. اللي متعودين عليه تكون المهمة رخمة وتقرف الكلب اللي عمال يعضعض في كوم الزبالة اللي جنب مدرسة الابتدائية اللي عندنا بقاله شهرين أجرها قليل ومكانتها منيلة على دماغ اللي بيعملها.

علم النفس الإنساني.. ولو فكرت في يوم اني بحبك من فضلك يا حبيبي انساني.. بالنسبة للكراش اوعي تنساني يا مرا.. الكلام دا مش ليكي. دا كوبليه لقيته على ظهر توكتوك لزق في دماغي والله 

في الستينيات، تطور الاتجاه نفسي وعارض العلوم الطبيعية والتقاليد الأكاديمية اللي التحليل النفسي والسلوكي كان بيتبعوها ودا لي بقا لإنهم ناس كيوت وحرام عليكم الفار دا مش يمكن عند ربنا أحسن منك؟ 

بص علم النفس الإنساني رفض التجارب والدراسات المختبرية على الحيوانات لفهم سلوك الانسان.. ما هو يعني أي تقولي الفار عرف يحل المتاهة من تاني محاولة وأنت مش عارف تحل مشكلة الكراش مالها هو الفار احسن منك؟ لا بس المتاهة اسهل من اني أخليها متقولش مليش بصراحة بقا.. احم اسف.

بدل من التجارب دي ادتنا تجارب الشخص وخياراته وقيمه وزنًا في فهم النفس البشرية بص احنا ندرس البشر من البشر بقا بلاش قلة أدب...

 كارل روجرز (1902-1987) أحد أكثر علماء النفس الإنسانيين تأثيرًا باعتباره مبتكر العلاج المتمحور حول العميل.

ابراهام ماسلو: كان شايف إن تنمية الشخصية هي بمثابة توازن بين الاحتياجات المادية واحتياجات النمو والتعبير عن الذات والبحث عن المعرفة.. 

والراجل دا لو طلع مؤسس علم قوم عافر انت مش علبة بسطرمة وامل نفس حروف الم هحذف اسمه من البحث علشان نكون على نور يعني.

عمك ماسلو كان ليه أهم أهمية لتأسيس علم النفس الإنساني باعتباره اتجاهًا نفسيًا خاصًا به وكانت مساهماته في مجال علم نفس الشخصية وعلم النفس التحفيزي.

سنة 1943، نشر المسودة الأولى لهرم ماسلو للاحتياجات ولو متعرفش أي هو الهرم دا فهو: نظرية نفسية اتقدمت في ورقة بحثية بعنوان "نظرية الدافع البشري" والهرم كان عبارة عن دراسة لمجموعة من البشر تم اختيارها بشكل دقيق طبعًا، يعم دا بيقولك ألبرت اينشتاين وفريدريك دوغلاس وجين آدمز وناس تقيلة يعني دا بدل ما يدرس ناس مضطربة ومرضى ما علينا يعني المهم الهرم كان بيتدرج حاجاته حسب أهمية احتياجات الانسان. بالشكل دا

الاحتياجات الفسيولوجية: ودي الاحتياجات المطلوبة انها تخليك على قيد الحياة: زي التنفس والأكل والشرب، ضبط التوازن، الجنس الإخراج والنوم.

الشخص اللي عنده مشاكل في الاحتياجات الفسيولوجية ممكن في المستقبل لو اتيحت له الفرصة يفرط في اشباعها.. يعوض بقوة لدرجة انها تزيد عن حدها طبعًا

احياجات الأمان: 

حسب الهرم بعد اشباع الحاجات الفسيولوجية لازم تطمن ودي تشمل: السلامة الجسدية من العنف والاعتداء بعدها الأمن الوظيفي ثم أمن الإيرادات والموارد ثم الأمن المعنوي والنفسي فالأمن الأسري ثم الأمن الصحي

بعد ما نشبع الأمان، نجيب نسوان.. لابد من الاحتياجات الاجتماعية بعدها..

ونبدأ بالعلاقات العاطفية وبعدها نتجوز نأمن على العلاقات الأسرية، نجيب صحاب بقا، وقالك ان البشر بشكل عام دايمًا بيشعروا بالحاجة إلى الانتماء والقبول سواء لمجموعات كبيرة زي النوادي والجماعات سواء دينية او سياسية والذي منه، او دايرة صغنونة على قد الشلة جبرت وطبعًا الحاجة إلى الحب والجنس ولو عنصر من دول راح المعلم ممكن يتعرض للإكتئاب او يكون عرضة للقلق وفي الحالتين هيكون في الشلاحة

بعد ما نأمن على النسوان.. لازم نتقدر بقا يبقا الحاجة إلى التقدير.. لازم يتم التركيز على تحقيق مكانة اجتماعية مرموقة قدر الإمكان ودا علشان يخلي الناس تحترمه هيحس بثقة وكلام من دا يعني

طبعًا وأخيرًا ولابد منه الحاجة لتحقيق الذات: ودي بقا بيحاول يعزز مهاراته وقدراته ويحاول يعمل إنجازات والكلام دا يعني.

الشكل الهرمي دا تم تطويره ليكون على الصورة اللي قولتها دي سنة 1971 في كتاب أبعد الحدود الطبيعية البشرية واللي اتنشر بعد ما مات.. 

بس كدا كفايا عليك لحد هنا يا صديقي وإلى القاء في الفصل القادم.

#الكاتب_الرمادي