شوفيلك حل في بُعدك
من بعدِك ميزاني اختل
واياك تردي عليا وتقولي
الصبر هوا الحل
الحل في عنيكي
اللي رافضه اللُقا مع عنيا
من بعدك عايش وحيد
ولو الكل حواليا
انا بتمني وجودك جنبي
بالرغم من قسوتك عليا
ولو كُنتِ فكره اني نسيتك
لاء انا كُنت ومازلت بحبك
وبفتكرك بِحُسن السيرة
ومن المستحيل اذكر اسم
حبيب غيرك....
دا أنا ليكِ بشتاق حتى واحنا بعاد
جميل الحُب لو يجمعنا
وعظيم القلب الي يصّفي اللي بينا
ويحاول يرجعنا
وانا بقلبي وعقلي بقولك وحشتيني
انا ف بُعدك رميت ضحكتي وسط لمه
عشان محدش يشوف حزني ونزيف قلبي
بقيت ممثل شاطر ومثلت الدور بشطاره
ووقت مَ المسرحية خلصت
سقف الجمهور بحراره
قدرت أمثل دور النسيان
والكُل صدق اني مبقتش ولهان
صدقوا إني مبقتش ميت في بُعدك
ونسيتك خلاص ونسيت اللي كان بينا
لو جُم فتحوا قلبي هيلاقوا انك جواه
دايمًا ملازماه ومش قابله تفارقيه
وحشتيني بكتبلك في اليوم ألف كلمه
وهموت وابعتها
ولكن بمسحها وبتراجع
أخاف تقولي مدلوق وتزودي في تُقلك
وعنادك يزيد اكتر وتمثلي
إني مبقتش فارقلك....
انا عارف وواثق إن دا كله تمثيل
ومن المستحيل يغيب الحنين
من قلبك..
وتنسي الي كان بيحبك..؟!
وكان في خيالك
أب لعيالك...
بكره ترجعيلي بس ساعتها مش هتلاقيني
مش هكون نسيتك او حتى كرهتك
دا انتِ ديمًا في بالي
ومفيش واحده غيرك هتبقا أم لعيالي
بس كل ما في الموضوع
إني هعاند شويه
وأعذب قلبك معايا
زي ما عذبتي قلبي سنين
وسبتيني في الوحده أسير
هقولك تاني وحشتيني
وشوقي ليكِ بيزيد
مبقتش عارف أرسم سكه سالكه
ميبقاش أخرها حدود عنيكي
مش عارف أمشي الطريق
من غير ما تسنديني بإديكي
وحشتيني...؟!
رودينا أحمد"بنت القمر"
حاجه فى منتهي الروعه مشاء الله ♥
ردحذف