خلصنا رحلتنا المرة اللي فاتت بان فرعون اسم علم لشخص و ليس لقب و جبنا الرأي و الرأي الآخر في الموضوع الا اني علشان اكون صريح كنت منحاز شوية للرأي الصواب و اللي هو فرعون اسم علم.
فعلشان كدا حجتي كانت قوية عن كونه لقب و دا طبيعي لان اللي بيقولوا انه لقب تفسيرهم غير مقنع زي ما ذكرنا و قولنا في نصف الفقرة ان في ناس بتقول ان فرعون رمسيس التاني و قولت هتكلم عليه قدام.
و ختمت الفقرة بإني قولت ان فرعون راجل من الهكسوس بس مأثبتش دا لسه، أعزائي المتابعين أهلا بكم في موضوع جديد بعنوان <رمسيس الثاني ما بين الملك و الفرعون> من فقرة (فرعون موسى ما بين حكم مصر و إيجبت) تابعونا.
خلينا أبدا كلامي معاكم بحاجة صغيرة كدا اللي هي ازاي انتشرت معلومة ان فرعون هو رمسيس التاني.
و بما إني هتكلم عن النقطة دي بشكل سريع يبقى لابد من ذكر المقال الشهير اللي بعنوان (خطورة القشرة المعلوماتيه) للدكتور "يوسف زيدان" (المقال و بإيجاز سريع بيحكي عن موضوع حصل مع الدكتور يوسف زيدان دا، بيقول انه كان في زيارة للمتحف المصري في القاهرة تحديدا قاعة الموميات في الطابق الأعلى حيث يوجد الملوك "سيتي"، "رمسيس"، ..الخ، المهم بيقول و هو خارج لقي او كان موشك على الخروج ان اردنا الدقة، (دقة و صلصة بتوع الكشري، هههه، ما هو بص مش هتتفاعل هدمرلك المرارة بتعك انا حذرتك اهو) المهم و هو خارج لقي شاب بالزي الرسمي الخاص بالموظفين بتوع المتحف يعني المهم الشاب دا لقيه بيهمس فودنه و قاله النص دا "هل تعرف هذا الملك، رمسيس الثاني ...فرعون" الدكتور بيقول في المقال انه صعق من الجملة السوداوية دي فبيسأله مين قالك الكلام دا لقي الشاب بتلقائية بيقول فيما معناه "كبار علماء الآثر" طبعا باقي المقال بيوضح ان المعلومة خطأ تماما...الخ بس الفكرة في ان الانتشار كان بالطرق دي و دا شكل من اشكالها.
زيارة للمتحف تلاقي موظف رشق المعلومة دي بكل ثقة و اسندها لعلماء الأثار انت شخص مبتحبش تقرأ او معندكش معلومة كافية مثلا هتسجل دي في دماغك و تعيش حياتك و مع الترديد و التلقين هتثبت عليه.
و في مقال تاني بعنوان "رمسيس الثاني المفترى عليه...هل هو فرعون" لـ" نهى داود" بتقول "لقد ظهرت الكثير من الدرسات الأجنبية اليهودية التي تؤكد أن فرعون هو رمسيس الثاني على الرغم من أنه لا يوجد دليل حتى الآن"
طبعا جالك سؤال صغير طب هما استفادوا ايه من الكلام دا حاجات كتير منها ادعاء ان اليهود هما اللي بنوا الأهرمات و تدمير الحضارة و الاستيلاء على بعض الآثار وحبشتكنات كتير كدا ملناش دعوة بيها مؤقتا على الأقل المهم.
من ضمن الناس اللي كانت متفقة مع الرأي دا (رمسيس الثاني هو فرعون)الدكتور "رشدي البراوي" صاحب كتاب "قصص الأنبياء و التواريخ" و كان قال "و أصحاب هذا الرأي كثيرون منهم (اولبرت - إيسفلت - روكسي - اونجر - الأب ديفو) و يتفق هذا الرأي مع حقيقة معيشة بني إسرائيل في ارض حاسان و عاصمة رمسيس الثاني الجديدة....الخ"
و ختم بجملة " و الحقيقة أن هذه (النظرية) أن "فرعون" هو رمسيس الثاني" تتفق مع الكثير من الصفات التي يجب توافرها في ذلك الملك"
طبعا في حاجات كتير مشابهة من دي بس هنكتفي بدول كتمهيد، نخش بقا على الشغل.
الدكتور "سعيد أبو العنين" في كتابه "فرعون الذي يطارده اليهود" (بيقول فيما معناه ان التوراة قالت ان فرعون غرق في البحر الأحمر و لم يعد له أثر، بس القران كان ليه رأي تاني في الموضوع دا و قال ان جثته قد انتشلت لتكون عظة و عبرة) نفرمل هنا بقا.
الجماعة التوراتيه تقريبا نسوا التوراة بتعتهم او مأمنوش بالنص بتاعهم و اسلموا هنا ما تفهم المهم انهم مسكوا بسنانهم في الآية اللي بتقول {اليوم ننجيك ببدنك لتكون لمن خلفك آية} و تحس انهم بيستعطفوا المسلمين او بيضحكوا على نفسهم ما تفهم.
المهم مسكوا الآية دي و قالوا اهو دليل من دينكم و هو دا رمسيس الثاني و بدنه زي ما هو اهو بحمضه و شعر و بصلاته و سلطاته كمان، و اما حسوا تقريبا ان التمثلية بتعتهم هتنفع رفعوا حباية هبدروكس 100 الف ملي و كملوا بجملة غريبة شوية و العالم كله اقتنع بيها تقريبا الحباية كانت مستوردة علشان كدا جابت نتيجة يعني، و الهبدة بصراحة من برا كشكلها الخارجي منطقي شويتين اللي هو ايد الملك رسميس الثاني كانت متسبسة في حالة تشنج بشكل غير طبيعي، فشافوا الوضع دا و الحباية كانت اشتغلت فقالوا كان بيقاول الغرق في لحظاته الأخيرة بحركة انفعالية لما المياة بتاع البحر الأحمر انطبقت عليه هو و جنوده.
طب ليه الموضوع دا هبد
انا اقولك لان كل المصادر بتقول ان الوضع اللي كان فيه الملك دا معروف بالوضع الأوزيري و هو تقاطع اليدين على الصدر، و المحنطين كانوا بيعملوا الجسم على الوضع دا تشبها بالإله اوزيريس لان الملك وفقا للمعتقدات المصرية القديمة بيتحول لصورة اوزيريس لما يموت دا اولا
ثانيا كل المصادر بتقول برضوا ان هو مات هو عنده 99 سنة و البعض قال انه مات و هو عنده 91 بس اختلاف في سن التسعينات بس اللي كلهم اتفقوا عليه انه كان عنده امراض الشيخوخة و الروماتيزم و المفاصل و الظهر المنحني بمعنى في سنواته الأخيرة مكنش يعرف يدخل الحمام لوحده (مجازا) فمش منطق انه هيركب عربية حربية و يحارب ضد موسى في حالته دي (قصة الخروج هنعرفها بعدين).
و اتكلم عن الموضوع دا الباحث الأثري "أحمد السنوسي" في كتابه "إثباتات بأن فرعون ليس رمسيس الثاني" و كان اتكلم في الكتاب ان لا رمسيس الثاني ولا ابنه مرنبتاح ماتوا غارقانين.
ثالثا رمسيس التاني كان ليه شأن كبير جدا في العالم القديم و لو غرق فعلا فمن سابع المستحيلات ان اعدائه من الاشوريين يتجاهلوا الحادثه دي من غير ما يدونوها في مصادرهم.(راجع ويكيبديا بكل اصدرات لغاتها)
رابعا و دا اللي انا استعجبتله ان كل المؤرخين اللي عاصرو رمسيس حتى الأجانب يعمي ولا مانيوتن السمانودي و لا هيرودوت اللي أنشأ موسوعة تاريخية و علمية عم شعوب العالم القديم مذكروش حاجة عن واقعة بينه و بين اليهود ولا غرقه حتى من قريب ولا من بعيد.
خامسا و اخرا في الموضوع اللي سندوا بيه الجملة بتاعتهم بتاع الملح اللي شافوه في المومياء بتاعته دا اسمه ملح وادي النطرون و موجود في كل المومياوات المحنطة لانه بيستخدم في التحنيط هو و زيت بزرة الكتان الحار. (راجع ويكيبديا برضوا، اسهل مصدر ليك)
و برضوا كان اتكلم في موضوع انه مات طبيعي دا الدكتور "أحمد فخري" في كتابه مصر الفرعونية"
و بما اننا اسقطنا الهبدة دي تاريخيا و علميا نرجع لموضوعنا بقا نجيب اهم الإثباتات لاني زهقت بصراحة.
1-لو رجعنا للقرآن تحديدا سورة "القصص" الآية 9 الاية اللي بتقول {قرة عين لي ولك لا تقتلوه عسى أن ينفعنا أو نتخذه ولدا} واضح من سياق الآية {قرة عين لي و لك} انهم كان عقيمين الاتنين مش الزوجة بس.
و التاريخ يذكر ان رمسيس كان ليه اللهم صلً علي النبي كدا 8 زوجات. غير جارياته طبعا و كان عنده اكثر من 150 ولد فكان هيبقى قرة عين ليه منين بقا بعد المدينة اللي فاتحها في بيتوا دي و مصدر الموضوع دا جدران معبد الرمسيوم منقوشة عليها اسمائهم كلها.
و علشان حرفيا زهقت و مكسل اكمل كتابه بالرغم من اني مسجل في الكشكول اضعاف المصادر و الاقتباسات و يدوب كدا خلصت ربع الموضوع من الجزء اللي محضره هنختم الموضوع بآية من القرآن
{و دمرنا ما كان يصنع فرعون و قومه و ما كانوا يعرشون}.
لو لاحظت هتلاقي اللفظ المستخد في الآيه "دمرنا" بمعنا الإبادة التامة لكل اللي كان بيصنعوا فرعرن و قومه في (الفترة بتعته) و من ضمنهم كل ما كانوا يعرشونه العرش بتاعهم يعني يعني تمت ابادة العرش بالمعابد بالصناعات بكل حاجة المنطق هنا يتدخل بقا
ازاي تم تدمير كل صناعات فرعون و قومه و احنا كل ما نبص في حتة نلاقي اثار لرمسيس الثاني يبقى الحل الوحيد ان فرعون مستحيل يكون رمسيس الثاني.
و بكدا احنا قولنا ان فرعون دا اسمه الحقيقي و اثبتنا كدا و اثبتنا انه مش رمسيس التاني طيب السؤال هنا مين فرعون و مين قومه و دا اللي هنتكلم عليه المرة الجاية، انتظروني.
#فرعون_موسى_ما_بين_حكم_مصر_و_إيجبت
#رمسيس_الثاني_ما_بين_الملك_و_الفرعون
#الكاتب_الرمادي
