خلصنا فقرتنا أمبارح بإقتباس لـ "سير آلن جاردنر" لما قال في كتابه " مصر الفراعنة"، النص دا "إن إستخدامنا لإصطلاح فرعون بالنسبة لأي ملك قبل الأسرة 18 يعد بمثابة خطأ في تسلسل تواريخ الأحداث".
و إللي بناء عليه قولنا إن اللفظ دا جا مع الهكسوس سواء إسم أو لقب مش هيفرق مؤقتًا المهم إنه جا معاهم هما، بمعنى اللفظ دا لا علاقة له باللهجة المصرية نهائيًا و مكنش موجود قبلهم.
طيب يا سيدي شكرا قولي بقا هو اسم ولا لقب مهو انت متقعدش تلفلي و تدور كتير و تسيبني حيران في النص زي المرة اللي فاتت
لا متقلقش مش هسيبك المرة دي اهلا بكم اعزائي المتابعين في حلقة جديدة بعنوان (فرعون اسم ام لقب) من فقرة (فرعون موسى ما بين حكم مصر و إيجبت)
بص هو في ناس قالت انه لقب و ناس قالت اسم علم
بالنسبة للناس اللي قالت لقب:
الأستاذ سعيد ابو العنين كان طرح السؤال مضمونه ليه القران مذكرش اسم فرعون و اكتفى بلقبه و كان دون السؤال بإجابته لبعض العلماء في كتابه الشهير "الفرعون الذي يطارده اليهود بين التوراة و القران" و كان من ضمن الإجابت اللي دونها للدكتور "الطيب النجار" قال "إن عدم ذكر اسمه يرجع إلى أن القرآن نزل بلغة العرب و العرب لا يعرفون عن إسم هؤلاء الناس شيئا و إنما يعرفون اللقب المشهور و هو كلمة فرعون.
و من ناحية أخري...فكإن كلمة فرعون يشار بها إلى الطغيان فهي رمز للطغيان و كأن الله سبحانه و تعالى قد أخفى هذا الإسم لأنه لا فائدة من ذكره...الخ" و كمل ان القران ليس كتاب تاريخ و انه هدايه و عظة ...الخ و كان رد نفس الرد دا بصيغة تانيه مع ثبوت المعنى "الدكتور عبد الصبور شاهين" و"الدكتور عبدالصبور مرزوق" و هتلاقيهم في نفس الكتاب و في نفس الصفحة و علشان اسهل عليك هتلاقيهم صفحة 77
بصراحة الرد دا معجبنيش قوي او مأقنعنيش خالص بغض النظر عن كم الأسئلة الهائل اللي جا في دماغي بتطعن في الرد دا هكتفي بكام نقطة الاول هو القران نزل بلغة العرب ماشي بس مش معناه انه نزل للعرب بس هو نزل للعالمين
الحاجة التانية ازاي ذكره ملوش لازمة و هو واحد من اهم الشخصيات اللي اتذكرت في الكتب المقدسة عموما و عمل مشكلة و فجوات كتير في التاريخ و خصوصا حضارة إيجبت، و طلع خزعبلات اكتر من ضمنها انه هو الملك رسميس التاني وموضوع رمسيس التاني دا هنتكلم عليه قدام، مش مشكلة لا تزال وجهة نظر قابلة للنقد
الرأي التاني و اللي انا بصراحة أرجحه ان هو أكثرهم صواب و ركز لا يزال كلامي نظرية قابله للنقد انا لسه شاب ابن 19حولا الا شوية المهم.
لو رجعت لـ"القرآن" كمصدر ليك في القصة دي و طبعا هو خير مصدر هتلاقي كام نقطة كدا كويسين.
اول حاجة مهتلقيش لفظ "فرعون" دا "جمع أبدا في القرآن" على اعتبار انه لقب و معناه ملك او حاكم مثلا زي ما بيقولوا و دا لان لفظ "فرعون" اسم علم و أسماء الأعلام مبتتجمعش دي لغة مفيهاش اختلاف.
النقطة التانية هتلاقي فرعون جي مقرون بأسماء أشخاص تانيه
يعني إفتح معايا سورة غافر الآية 23 و إقرا الآية {و لقد أرسلنا موسى بآياتنا و سلطان مبين إلى فرعون و هامان و قارون}
و هتلاقي في سورة العنكبوت الآية 39 الشطر التاني على ما أذكر {...و قارون و فرعون و هامان و لقد جاءهم موسى بالبينات}
نقف هنا بقا شوية المنطق بيقول ان القرآن ذكر اسم فرعون في الأول، مرة و بعديه إسمين لأشخاص تانيه و مرة تاني جاب إسم فرعون في النص بين أشخاص تانيه. فالطبيعي يكون فرعون دا اسمه و ليس لقبه و ليه ؟ هشرحلك قدام كمل
الحاجة التالته في سورة الأعراف الآية 104 هتلاقي اللفظ مصحوب بـ ياء النداء لاحظ كدا { و قال موسى يا فرعون} و المعروف ان الياء بتاع النداء بتكون مصحوبة بإسم علم لشخص و ليس لقب لانها لو لقب هيقول يا أيها الفرعون زي ما قال في الآية 88 في سورة يوسف { قالوا يا أيها العزيز مسنا و أهلنا الضر }
و كمان لما تيجي للآية 101 و 102 في سورة الإسراء هتلاقي محادثة مع شخصين بإسمهم المجرد لاحظ كدا
101 الإسراء {إني لأظنك يا موسى مسحورا}
102 الإسراء {و إني لأظنك يا فرعون مثبورا}
النقطة الرابعة ان في أنبياء كتير نزلوا أرض مصر زي سيدنا ابرهيم عليه الصلاة و السلام و سيدنا يعقوب و يوسف عليهما السلام، و عاصروا حكامهم و مفيش حد منهم اتقال عليه لقب "فرعون" يعني سيدنا ابرهيم عليه الصلاة و السلام الحاكم اللي عاصره اتقال عليه الملك رغم اننا كلنا عارفين القصة و التجبر بتاعه و طغيانه و لا يقل عن فرعون موسى بشيء و سيدنا يوسف برضوا الملك اللي عاصره اتقال عليه الملك في خمس مواضع و هناك العزيز برضوا
لكن سيدنا موسى الحاكم اللي عاصره اتقال عليه "فرعون" من غير أل التعريفية و اتذكر اللفظ مجرد في اربعة و سبعين موضع في القران، مقتنعتش مش مشكلة تعالى نكمل؟
زي ما قلتلك في المقدمة ان بعد الضغط بتاع علماء الدين على بتوع الآثار فجابوا ليه اسم (بر-عا) و في رواية تانيه (بر-عو)
برعو اتذكرت في كتاب "فرعون موسى بين الأسطورة و التاريخ" لـ" عصام الدين حفني" و كان كاتب ان معناها الرجل الذي يعيش في البيت العظيم لو هنبص للآيات على إنه لقب ( و دا خطأ) هتكون أكثر منطقية بس فيه مشكلة صغيرة خلتني موثقش كلامه في الكتاب دا رغم انه ليه مؤلفات كتيره
المشكلة انه مجبش مصدر ولا مرجع واحد يسند بيه كلامه و المشكلة الأكبر ان مرجعه الوحيد هو التوراة (السبعينية) و تقريبا كام آية و غالبا مذكرهمش كمان،
لكن كلمة (بر-عا) قالها كتير من علماء الآثار الموثقين و على رأسهم السير ألان جاردنر في كتابه النحو المصري، و السير آرثر ايفانز و العالم ألن شورتر و غيرهم كتير و اللي معناها الحرفي البيت الكبير أو القصر و ملهاش علاقة بأشخاص
بس بتوع التوراه كان ليهم رأي تاني في الموضوع دا
قالوا ماشي احنا موافقين ان معناها القصر و البيت الكبير زي ما بتقولوا بس دا تعبير مجازي عن الحكم زي مثلا البيت الأبيض بيشير لحاكم أمريكا و قصر الإليزية لحاكم فرنسا و هكذا
ماشي بصراحة الكلام مقنع شوية بس مش في القصة دي يبقى مقنع لو بنتكلم عن حد تاني ليه بقى أنا أقولك متغلبش نفسك أنت
مش منطقي إن ربنا ينادي سيدنا "موسى" بإسمه المجرد و ييجي لفرعون عدوه و يعظمه بتعبير مجازي ري دا مش منطقي
و بعدين تعالى نروح للقران تاني تأمل شوية كدا في الآية اللي بتقول
{نتلوا عليك من نباء موسى و فرعون بالحق} جرب تبدل فرعون بالمعنى بتاعه كدا هتحسه بيفخم فرعون و بيعظم فيه و المنطق بيقول انه المفروض يهينه.
يغظمه ازاي و هو واصفه بكل عيب و نقص
دكتور "سعيد ثابت" في كتابه "فرعون موسى من يكون و أين و متى" قال "من الإستحالة أن تكون كلمة فرعون لقبًا لحاكم لأن الألقاب تقارن بأسماء الملوك بغرض التفخيم، و هذا ولما كان النص القرآني قد أفاد في الكثير من الوجوه إجرام هذا الملك ووصفه بكل عيب و نقيصة فليس من المعقول أن يأتي النص بعد ذلك معظمًا له فيناديه بلقبه (تعظيمًا) و ليس بإسمه(تقليلًا)
و عندك برضوا التوراة خروج6/11 قالت "إدخل قل لفرعون ملك مصر أن يطلق بني إسرائيل"
هتلاحظ ان جاب الإسم و صفته فرعون ملك مصر و حسب كلام الدكتور عاطف عزت "كان لابد أن تذكره التوراة بإسمه و الا كان سيعد من الغرائب أن لا تذكر التوراة اسم الملك الذي سامهم سوء العذاب"
و بعدها طرح سؤال "أم ترى ان هذا الملك لم يكن مهمًا"
و رد على نفسه قائلا "و كيف تتجاهله و لا تأتي بإسمه و هي التي لم تتردد في ذكر ملكين مصريين آخرين أقل أهمية و هما "شيشنق" و "نخاو" بإسميهما"
طيب يا عم عز انت كل دا عمال تقولنا انه اسم مش لقب خلاص اقتنعنا و لو مقتنعناش هنروح نشوف المصادر بتعتك و نقتنع و لو مقتنعناش فيه كمنتات نقولك فيها اعتراضنا بس فيه حاجة ناقصة
-ايه هي؟
=انت قولتلنا ان دا اسمه و جا بدخول الهكسوس...الخ بس مأثبتش ان من الهكسوس فين دليلك انه هكسوسي و قولتلي هثبتلك انه مش رمسيس التاني و مأثبتش
لا منا لو قولتلك دلوقت هتفيص مني دا ان مكنتش فيصت في نصف الفقرة هقولك بكرا، دلوقت اسيبك انا، تتأكدلي من المصادر و تفكر مع نفسك و بالمرة اروح اذاكرلي شوية علشان تقريبا كدا هسقط انتظروني الفقره الجاية بعنوان
#فرعون_موسى_ما_بين_حكم_مصر_و_إيجبت
#الكاتب_الرمادي
