من شات القراء
ذكرت السلبيات والمميزات 😂
(رواية المسخ ذو الوجه البرئ/ رواية حرب باندورا)
في الأول كنت ناوية اكتب ريڤيو فصحى واعيش دور الناقد الأدبي واقييم كل حاجة من ١٠ وبتاع بس انا نفسي لما بشوف ريڤيو من النوع دا مبقرأهوش😂
فدعونا لا نأخد الأمور على محمل الجد ونتكلم عادي كأني برشح لواحدة صاحبتي رواية😂
ف هبدأ الريڤيو بنبذة عن الرواية وهيكون بمنتهى المصداقية عشان مبحبش أجامل في الروايات🙂😂❤️
السلسلة عامة بدون دخول في تفاصيل وحرق أحداث بتتكلم عن طفل أهله توفوا وحضانته اتنقلت لعمه ولأسباب ما قرر يبعته لملجأ ومن هنا بدأت المشكلة، الرواية عرضت الجانب السوداوي للملاجئ ومعاملتهم السيئة اللي قد تصل للاعتداء الجنسي على الأطفال، ودا كانت بداية لشر البطل (اللي الكاتب حاول يبينه مجرد رد فعل وأنه مكانش بيضر غير الناس السيئة بس ولكن دا ميمنعش إن رد فعله غلط) اتبنى الولد دا عيلة علشان يكمل مسيرتهم اللي بدأوها رغمًا عنهم وهي تحضير الجن أو التعامل مع العالم السفلي عامة واللي كان لسبب بالنسبالي مش منطقي ومكانش مستاهل أنهم يبدأوا بيه (الزوجة قتلت حد حاول الاعتداء عليها وخافوا تتسجن ف قرروا تحضيير جن يساعدهم في إخفاء الجثة واللي كان شرطه أنهم يستمروا في تحضيره هما ونسلهم حتى لو بالتبني رغم إن القضية دفاع عن النفس عادي -بس المخرج عاوز كدا😂-)
من أقوى الحوارات اللي في الرواية وهتحس انك مش عاوزها تخلص هي اللي بتكون بين عز وديمون (بالمناسبة هما نفس ذات الشخص بس تقدر تقول عنده انفصام ودايمًا في صراع مع نفسه) تعبيرات الكاتب وتصويراته في الحوار اللي بيكون بينهم قوية جدا
التعذيب في المسخ كان مقتبس من طرق تعذيب استُخدمت في العصور الوسطى لكن في باندورا الموضوع بقا مرعب أكتر 🥲 مشاهد التعذيب قوية الناس اللي بتحب الرعب كيب جونج في الرواية دي😂
اه واعملوا حسابكم هتخسروا ثقتكم في كل الناس بعد الرواية دي😂 كل الناس شريرة بجد🙂😂
تعالوا نقول المميزات والعيوب
العيوب الأول: في المسخ الكاتب استخدم فلاش باك كتير جدًا مكانش ليه داعي كان يقدر يحكي بتتابع الأحداث الطبيعي أفضل (ودا تم تعديله في باندورا الفلاش باك في مكانه وتتابع الأحداث كويس جدًا وعرف يظبط الحبكة بشكل كبير جدا)
السرد كان ضعيف شوية في المسخ (اعتقد المشكلة من الدار لأنها كان المفروض تدقق لغويًا قبل ما تنشر) عكس باندورا تمامًا لدرجة إني استغربت إزاي الفرق بين الروايتين سنة بس
الحوار في المسخ كان شوية فصحى وشوية عامية ودا معجبنيش بصراحة (تم التعديل في باندورا وكان الحوار تقريبًا كله فصحى)
مشاهد التعذيب في المسخ برضو كان الشرح بتاع آلية التعذيب أو الأداة بتاعته في نص المشهد كان بيفصلني من الرواية والأحداث بس برضو الكاتب عرف يصلح دا في باندورا
والاغلفة غلاف المسخ مكانش أحسن حاجة لكن باندورا كان حلو ومُعبر عن الرواية واحترافي أكتر
وبسكدا نقدر نقول إن كل العيوب اتعدلت في تاني رواية من السلسلة
مميزات السلسلة:
أولا الفكرة جديدة مقرأتش حاجة من النوع دا قبل كدا
كل العيوب اللي في المسخ اتعدلت وبقت مميزات في باندورا يعني السرد بقى اقوى وطرق التعذيب اللي استخدمها في باندورا وطريقة عرض المشهد أصلا بقت بحرفية أكتر، وفيها تشويق أكتر كمان وأحداث غير متوقعة
حاجة تانية الرواية فيها معلومات في أكتر من مجال ودا عجبني جدًا جدًا
الرواية تستحق القراءة فعلًا مع العلم إن مش بسهولة رواية تعجبني وإني كمان بقالي ٣ سنين تقريبا مبقرأش روايات بس من الفيد باك اللي شوفته عن الرواية قررت اجيبها واقرأها ومندمتش ومنتظرة الجزء التالت من السلسلة واللي متأكدة أنه هيكون اقوى كمان
اتمنى لو عملوا طبعة تانية من المسخ يعدلوا السلبيات اللي فيها وتتدقق لغويًا والغلاف يتغير + يُفضل تقرأوا المسخ قبل باندورا بحيث تكونوا فاهمين الحكاية من أولها
