ختان الإناث
المقال الأصعب، والأكثر جهدا، والأكثر تصادما مع الجميع، لكني أعدك أنك سترضى عن الختان تماما بعد هذا المقال :) وهتحبه وهترفع لواء الدفاع عنه.
مبدأيا الصدمة الأولى
نعم الختان يعالج برود النساء الجنسي
ونعم الختان أكثر الأشياء جورا في تسبب البرود الجنسي عند النساء
لا متلخبطناش يا عم أسيم الله يكرمك -_-
حاضر
النهارده 6 فبراير اليوم العالمي لمناهضة ختان الإناث وتشويه الأعضاء الجنسية
فـ يا ترى احنا موقفنا إيه من الحدوتة دي؟!
بسم الله، ربنا افتح بيننا وبين قومنا بالحق وأنت خير الفاتحين..
كوباية نسكافيهك بقى وأغلق ضجيج العالم وركز معايا :)
ربنا لما خلقنا كلنا أجنة في بطون أمهاتنا كنا كلنا شكل واحد و خلايانا زي بعض ذكورا و إناثا.. و بتأثير الهرمونات تبتدي الخلايا تتخصص و الأعضاء تاخد أشكالها ذكرية أو أنثوية.. لكن الأصل واحد..
الخلايا اللي بتعمل خصية في الولد = بتعمل مبايض في البنت،
و اللي بتعمل رحم في البنت = بتكوِّن بروستاتا في الولد،
ولو طلعنا للأعضاء الخارجية هنلاقيهم زي بعض برضه.. اللي بيعمل القضيب للذكر (penis) بيعمل بظر (clitoris) و شفرات داخلية (labia minora) للبنت، و اللي بيعمل كيس الصفن في الولد بيكون شفرات خارجية في البنت..
الخلاصة ... التركيب التشريحي تقريبا واحد..
طيب ليه أغلب الأولاد بيتعمل لهم ختان؟
الولد الطبيعي بيكون عنده جلد زائد عند القضيب بتاعه إسمها (قلفة)
الجلدة دي بتعمل جيب بينها و بين رأس القضيب اللي هي أكتر جزء حساس فيه، ... الجيب ده بيكون بيئة محترمة جدًا للالتهابات و العدوى..
ده غير إن تغطية رأس القضيب ده بالجلدة دي بيخلي الراجل يوم ما يمارس العلاقة الجنسية يبقى عنده مشكلة في الإحساس و الاستمتاع بالعلاقة.. بغض النظر عن إن الإحصائيات قالت إن النساء يستمتعن بالرجل الذي لم يُختتن عن الرجل الذي اختُتن، لكن في النهاية مفاسد عدم اختتان الرجال كبيرة..
في المطلق لما نعمل ختان أو طهارة للصبيان بنشيل الجلدة دي كوقاية أو علاج للالتهابات، و عشان نخلي الولد لما يكبر و يتجوز يقدر يستمتع بالعلاقة مع زوجته..
ليه في الأول قلنا أغلب الولاد؟
علشان فيه حاجه كتير مننا سمع عنها ألا وهي الإحليل السفلي،
و بالشعبي كده "طهارة الملايكة"
أولاد بيتولدوا بمشكلة في مكان فتحة البول.. مش بتكون في قمة القضيب زي الأولاد الطبيعيين، لا بتكون من تحت لدرجه ممكن توصل إنها تبقى فى نفس المكان إللى موجوده فى البنات إللى هى اسمها منطقة العجان الحاله دى طبيا اسمها ( Perineal Hypospadias )
و ده بيدخل في تشخيصات دقيقه فى تحديد الجنس اللي هو أصلا ممكن في الآخر يطلع بنت، أو يبقوا فاكرينها بنت و تطلع ولد..
حالات الإحليل السفلي دي بيكون فيها القلفة اللي بتتشال في الختان غير مكتملة و ممكن تبقى تقريبا مش موجودة في بعض الحالات .. زي إللى بتبقى الفتحه من تحت خالص فى منطقة (العجان)..
ولو موجود،.. الجلد بتاعها ده بنحتاجه في عمليات الإصلاح إللى بنقوم بيها للجهاز التناسلى علشان يرجع لشكله الطبيعى.. و عشان كده بيعلموا طلبة طب إنهم لو شافوا مولود بالاحليل السفلى ميطاهرش.. يعمل عملياته الأول وبعدين لو اتبقى جلد نبقى نطاهر الولد و نشيلهوله..
ليه بنشرح بالتفصيل الممل ده؟
احنا في الأول قلنا إن الأصول في الولد و البنت واحدة، و الأعضاء تقريبا واحدة لكن اختلاف الاسماء...
بس البنت عندها فتحة مجرى البول في العجان أصلا..
بمعنى اخر.. البنت تركيبها التشريحي أقرب للولد اللي عنده إحليل سفلي عجاني..
يعني يا عم أسيم البنات معندهاش قلفة اللي بيتشال في ختان الولاد؟
طبعا الإجابة لا.. زي ما أغلب الولاد الطبيعيين عندهم القلفة دي، و قلة اللي بتكون مش موجودة فيهم، برضه البنات أغلبهم معندهومش الجلدة الزيادة دي و قلة اللي بتكون عندهم..
طيب و دي برضه لو موجودة بتكون اسمه قلفه؟
لا.. اسمها Hood يعني رداء أو غطاء..
طيب و ده لو موجود بيكون فين و بيحصل ايه؟
ده لو موجود بيكون مغطي البظر و بيعمل زي القلفة بتاعة الذكر كده.. التهابات متكررة، و إعاقة الإحساس بالمتعة أثناء العلاقة الحميمية..
طيب و له حل؟
ايوه وصحصح معايا بقى علشان جينا للمنطقة الشائكة .. ده بيتعمل له عملية تجميلية بيتشال فيها الغطا ده، و اسمها Hoodectomy
لو عاوزين بقى نبقى منصفين، العملية اللي اسمها Hoodectomy دي هي اللي المفروض يبقى اسمها ختان.. هوب هوب هوب
مين بقى اللي يتعمل لها الـ Hoodectomy دي؟
المفروض ان العملية دي تتعمل لواحدة ست بالغة رشيدة عاقلة مسئولة عن تصرفاتها..
بتشتكي من شكوى من اتنين؛ إما بيحصل لها التهابات متكررة في المنطقة دي أو إنها ست متزوجة لكن حاسة بوجود ما يعيق احساسها بالاستمتاع..
آه يا مولانا .. عندها برود جنسي، أو فاقدة الإحساس.. شفت الآية اتقلبت ازاي، يبقى الختان الجائر الذي لا علاقة له بشرع ولا طب ولا عقل هو السبب الرئيس في تشويه أعضاء وظيفتها الحسية إيصال الشعور للمخ، واحنا هنا بنعالج الأنثى التي خلقت فلم تُختتن، لكنها تشعر بأنها لا يصل لها الإحساس بهذا الختان الحق الذي نتحدث عنه .. فهمت الفرق الشاسع عامل ازاي!
طبعا في الحالة دي تلك الأنثى العاقلة بتروح لدكتور تجميل أو دكتور نساء يفحصها و يشوف هل الـ Hood ده موجود فعلا و مغطي البظر فيتشال،
وساعتها يبقى فعلا ممكن نقول إن هو ده الختان الذي أشار إليه النبي صلى الله عليه وسلم " أنضر للوجه و أحظى للزوج " وهنا الطب يمتثل لحديث النبي صلى الله عليه وسلم كما أشرنا.
عملية الـ Hoodectomy اللي المفروض يكون اسمها ختان بينتج عنها زيادة استمتاع الزوجة بالعلاقة الزوجية الخاصة.. مش بتمنع الشهوة.. وده جواب الصدمة التي هي في صدر المنشور .. إن الختان الحق يعطي المرأة حقها في الاستمتاع، ويحافظ لها على ذلك، ويقيها من البرود الجنسي..
ده تعريف الختان الحق
ده تعريف الختان اللي يرضي الله عز وجل
فهمنا كده يعني ايه ختان؟
طيب إيه الجور والقتل البطيء والجهل المدقع اللي بيحصل عندنا في مصر وإفريقيا تحت مسمى الختان؟
باختصار شديد مقيت بيقطعوا أعضاء سليمة ذات وظيفة هامة في الجسم..
الاضرار كتيييييير جدا.. منها أضرار بدنية و أضرار نفسية..
الأضرار النفسية كتير جدا بداية من الصدمة اللي بتتعرضلها البنت من ازدواجية معايير الأهل، طفلة صغيرة تمن تسع سنين بيقولولها طول عمرها دي منطقة خاصة و عيب حد يشوفها أو يلمسها، و تلاقيهم مرة واحدة راحوا واخدينها لحد غريب يبص عليها و يحسس و يقطع كمان!!! شيء في منتهى القسوة و العنف، والقذارة والجهل والسفه... أوقفوا ذلك، ووعوا الناس إنهم يوقفوه
كفاية جهل وقرف بدعوى الحفاظ على عفة البنت
اللي بيقطع ده بيقطع اعضاء هامة و حساسة... تخيلوها كده في ولد ابوه خده يطاهره، راح قال للي بيعمله الطهارة، لا شيل معاك راس القضيب.. لا كده مش كفاية، شيل كمان باقي القضيب، او عشان يريح نفسه و ضميره راح قايله خد كيس الصفن معاك بالمرة... شيء في منتهى الجهل و الظلم..
الحاجة التانية همه بيعملوا التشويه ده ليه؟
عشان حد في غياهب الأزمنة البائدة فهمهم إن لما تقطع للبنت أعضائها الحساسة يبقى بتحافظ على شرفها و تكبت شهوتها.. قامت الناس من جهلها صدقت و مشيت ورا الخرافة دي..
الشهوة اصلا منبعها المخ.. و الأعضاء دي وظيفتها حسية تستجيب للمخ بالممارسة، و تبعت اشارات حسية للمخ بالاستمتاع إلى أن يحدث الإشباع
وتحصل النشوة..
لما تتقطع الأعضاء دي مش بتقف الشهوة.. لإن المخ موجود، لكن وقت الممارسة مش بتوصل الإشارات الحسية اللي بتوصل للنشوة، و ده بيسبب احتقان في الحوض، و ما يشبه حالة دوالي الخصية اللي بتحصل عندنا..
و ده بينتج عنه آلام شديدة أثناء الجماع، فـ الست تبقى بتتعذب و كارهة العلاقة المؤلمة دي، و يتهموها بالبرود الجنسي و عجزها عن إنها تعف زوجها..
من الاضرار برضه بالذات في الأنواع اللي بيشيلوا فيها الشفرات و يخيطوا دي.. إن ممكن توصل بالست في الآخر إنها تبقى مستحيل تولد ولادة طبيعية من كتر التليف و التشوه اللي حاصل في المنطقة..
والأنواع الأقل وحشية بتكون أضعف الإيمان لازم يتعملها توسيع وهى بتولد وده بقينا نشوفه كتير....
ووارد التوسيع فى المهبل ده يكون كبير وندخل فى مشاكل تانيه جديده فى العلاقه الزوجيه
نقطة فلسفية أخيرة... ربنا سبحانه وتعالى خلق جوانا غريزة التناسل و التكاثر.. و خلق ده متعة للبشر كلهم رجالة و ستات.. و ربنا عدل، مستحيل نصدق إنه يشرع للراجل سنة تزود متعته، و للست كبت و ألم؟
البغاشة
اللي بيحصل في مصر تحت مسمى ختان الإناث هو جريمة مكتملة الأركان من حيث الهدف و الدافع و الممارسة.. ولا يجب أن يطلق عليه ختان اصلا
وإنما اسمه في كل مكان في العالم هو تشويه الأعضاء التناسلية الأنثوية
female genital mutilation (FGM)
الختان هو استئصال جلد يغطي رأس القضيب في الذكر أو البظر (ان وجد هذا الجلد) في الأنثى زي اللي في الصورة دي، وهدفه علاج و منع الالتهابات المتكررة و زيادة المتعة الجنسية..
طيب و بالنسبة للحالات اللي بيكون عندها تضخم في البظر؟
فيه ناس فاكرة إن دي بتستدعي الختان.. لكن الحقيقة مش كده..
أولا تضخم البظر ده مش حاجة شائعة..
ثانيا لازم نتاكد إن الحالة دي أنثى.. لأن تضخم البظر أحيانا بيكون معاه مشاكل تانية زي مثلا عدم تكون القناة المهبلية، و ده بيدخلنا في موال تاني.. يا ترى المريض اللي قدامنا ده ذكر ولا انثى؟
فلازم لما نشوف حاجة زي دي نفحص المريض/ة كويس جدا، و نعملها تحليل كروموسومات عشان نتاكد انها بنت (xx) مش ولد (xy) و ممكن إشاعات كمان عشان نشوف الأعضاء الداخلية..
خلاص اتاكدنا انها بنت، و الحالة اللي قدامنا دي تضخم في البظر (clitoromegaly) مش احليل سفلي عجاني و صغر لحجم القضيب، بيتعملها عملية ظاهرها تصغير حجم البظر، لكن الحقيقة إن مفيش في العملية دي أي قطع لأي نسيج من البظر..
وإنما اللي بيتعمل هو دفن و تثبيت الجزء الظاهر من البظر تحت الجلد و تثبيته في انسجة الحوض، بحيث يبقى جزء صغير كده الطبيعي ظهوره من البظر.. و الجلد الزائد يتشال..
البغاشة سريعا
احنا كناس عاقلين واعيين مسلمين وفاهمين كويس عدل ربنا لازم يكون ده منهجنا في تناول قضية الختان، نعم ذكره النبي صلى الله عليه وسلم وله أدلة كثير من العلماء تناقش في ضعفها، لكن عُضدت كثيرا، سيدنا الإمام ابن تيمية لما سُئل عن الختان؟
قال بسم الله، نعم تُختتن، وختانها أن تُقطع أعلى الجلدة التي هي كعُرف الديك
انتهى كلامه
استخدم لفظا دقيقا للغاية متطابق مع ما قاله لنا العلم، الذي لم يعارض أبدا نظرة الإسلام للختان، بل أيدها وعضدها ورضي عنها، لكن المجرمين أخرجوا الأمر عن نطاقه وحده، وعاثوا في فروج النساء فسادا، فانقلب ذلك على الرجال والنساء ..
أكثر المقال منقول من مقال طبيبة مدرس مساعد جراحة تجميل، وكنا قد كتبنا مقالا طويلا أكثر تعقيدا من هذه المقطوعات السلسلة، فأرسلها لنا أحد الشباب جزاه الله خيرا، فآثرنا أن يصل العلم على أن نأخذ مجدا.. وأشكر للطبيب المحترم مستشار الجروب د. محمد، وكذلك د. محمد يحيى جادو، والطبيب الصيدلي المجتهد حسام الفولي، واستاذنا الدكتور القامة د. هشام فهمي رئيس قسم الجراحة التناسلية مستشفى المحلة الكبرى، ولفيف أعضاء مجلس حكماء شكة دبوس على الجهد الكبير في هذا المقال، والنقاشات التي لم تهدأ فيه، حتى يخرج بحُلته كما ترون..
منقول من جروب شكة دبوس للعم أسيم
