النهاردة هو اليوم التاني لملخص كورس مدرسة الكاريزما والثقة بالنفس واللي موجود على يوديمي و على قناة الزتونة وهضيف حاجات من عندي ك عز قريتها في كام كتاب كده على مدار السنين اللي فاتت ولازم تعرف إني بتعب جدا فالملخصات ديه فأتمنى تحسسني ولو بجزء صغير ان تعبي ده جاي بفايدة
النهاردة هنكمل انواع الشخصيات الكاريزماتك او انواع الأشخاص أصحاب الكاريزما
المرة اللي فاتت اتكلمنا عن تلات انواع واللي هما النوع الصريح والنوع المتعاطف والنوع الواثق في نفسه
النهاردة بقى هكلمك عن ٣ انواع صعبين جدا بس
4-الشخص صاحب الطاقة العالية
والشخص ده فالغالب بيكون متحرك جدا وعنده نشاط جدا .. تخيل نفسك قاعد في وسط اجتماع وفيه شخص عمال يقوم ويشرح وجهة نظره ويقعد ومع كل كلمة بيقوم يعترض فالغالب الشخص ده مع كل كلمة عينك هتروح معاه وهتركز معاه جدا لإنه ببساطة عرف يشدك
5-الشخص المرح.
والشخصية ديه بتكون دايما عاملة ستار ليها او زي ماسك كده مركباه مهما كان الحزن تحب القاعدة او المكان اللي هما فيه كله ضحك وبس ومع كل حاجة بتحصل انت كشخص بتكون مستني تعليقه او هزاره على الموقف وبتكون مشدود جدا
6-الشخصية صاحبة الرفاهية او الشخصية اللي شكلها حلو
هنفترض انك قدامك ٣ عروض .. واحدة حلوة جدا ولابسة شيك بس عقليتها ضعيفة سيكا .. وواحدة حلوة بس مبهدلة في نفسها ونضارة كعب كوباية وشعرها زي ما بتقعد فالبيت ومش مستعدة خالص بس عقلية كويسة جدا طبيعي هتبص على البنت الحلوة وعينك هتركز معاها لإنها مستعدة للموقف وشكلها عاكس شخصية واثقة غير البنت التانية ..
اشهر مثال على ده في مصر طبعا هو احمد عز اللي لو اعتمد على موهبته فقط مكنش ظهر ولو اعتمد على جماله فقط مكنش ظهر .. بل هو اظهر جزء تالت خالص وهو ستايل اللبس .. خلاك تؤمن ان الراجل ده چان وحلم كل بنت بالبدلة والعربية
و زي أسر ياسين مثلا ..
-تمام يا عم عز اية المطلوب مني بقى؟
بص يا سيدي دلوقتي انا عديتلك ٦ شخصيات تفتكر الشخص اللي عنده كاريزما هو شخص منهم ولا اكتر من شخصية
-حاجة منهم طبعا وإلا هيبان كداب
لا طبعا الشخص اللي عنده كاريزما قوية ومؤثر فالناس هو الشخص اللي يقدر يتحكم في مشاعره ويظهر الشخصية اللي هو محتاجها حسب الموقف .. الشخص اللي عنده ذكاء اجتماعي وذكاء عاطفي ودول اهم من الذكاء الطبيعي
فالكورس ده احنا هنحاول نطور الذكاء الاجتماعي والعاطفي بس اللي مطلوب منك دلوقتي انك تحدد فال٦ شخصيات دول اية الشخصيات اللي فيك ولو بصورة صغيرة عشان هتبدأ في تطويرها الاول وبعدين تنتقل لباقي الشخصيات وتكتسبهم
ومتنساش انك تقرا كل حرف وتكتب الملاحظات المهمة في ورقة وتخليها معاك عشان تدرب
#عز_حاتم ♥️
