النهاردة هو اليوم الرابع لملخص كورس مدرسة الكاريزما والثقة بالنفس واللي موجود على يوديمي و على قناة الزتونة وهضيف حاجات من عندي ك عز قريتها في كام كتاب كده على مدار السنين اللي فاتت
حابب اقول في البداية ان الكاريزما والثقة بالنفس زيهم زي اي مهارة يمكن تعلمها والتدرب عليها ♥️
......................................
هنتكلم النهاردة عن خطوات بسيطة بالتدريب عليها تقدر ترفع ثقتك بنفسك جدا
اول حاجة تقدر تعملها هي تسجيل قصتك الخاصة او كتابة قصتك
-يعني اية تسجيل قصتي يا استاذ عز؟
بص يا باشا الثقة بالنفس في وجهة نظري هي عبارة عن هرم كبير جدا اساسه وقاعدته بتتكون من عوامل كتير زي فكرة احترامك لنفسك زي فكرة تقديرك لنفسك .
ودول بيبقوا نوعين، معتقدات ايجابية ومعتقدات سلبية.
المعتقدات الايجابية ديه بتزود ثقتك في نفسك جدا وبتخليك اقوى وافضل على عكس المعتقدات السلبية اللي بتسبب قلة الثقة وكمان جلد الذات وتحميل ذاتك حمل ثقيل جدا وكمان فكرة الاوفر ثينكينج وفكرة انك شايف نفسك فاشل، كل ده بيجي من حكمك على ذاتك وحكمك على نفسك
كل واحد فينا عنده عشرات بل مئات المميزات والفوائد في حياته وعنده كام عيب قليلين جدا ،
الشخص اللي عنده ثقة في نفسه هو الشخص اللي بيشوف مميزاته ديه ويثق فيها ويثق انه كويس رغم عيوبه وان كل شخص فيه عيوب. لكن الشخص السلبي او اللي معندوش ثقة هو الشخص اللي سايب كل الصفحة البيضة ديه وهيركز عالنقطة السودة.
-تمام وده اية علاقته بالقصة او يعني اية قصة اصلا؟
بص يا سيدي انت هتكتب في سطرين عن اي انجاز ليك، حتى لو معندكش انجازات اكتب طموحك، اكتب عن ماتش كسبته، عن امتحان نجحت فيه ومكنش قدامك وقت، عن تصرفك الصح في الوقت الصح، اكتب عن انجاز ليك والانجاز ده مش بس هتحكيه لو حد سألك لا انت هتحكيه لنفسك، هتبرمج نفسك انك تقدر. القصة ديه هتكون مصدر من مصادر الفخر.
تاني حاجة هنعملها هي تحديد مصادر القوة او الفخر في حياتك
عاوز اسألك سؤال، فاكر ايام الابتدائي لما كنت شاطر وعندك طموح ؟ عارف اية اللي كان بيخليك شاطر ؟
كلمة "لما اكبر وابقى غني" الكلمة ديه كانت بتخلينا كلنا نذاكر وكلنا نفكر في المستقبل بصورة كويسة وكلنا نحاول نبقى احسن، بس فجأة كله بيقولك مفيش الكلام ده وفجأة بقينا كبار ومش اغنياء ، ده بيسبب نوع من انواع اليأس واحساسك بإنك بعيد عن احلامك وعن طموحك وده بيجيب نتايج سلبية، لازم تفهم ان مفيش اي خطر ولا اي مشكلة انك تبدأ ولو بعد سن السبعين بس الاول لازم تعمل حاجة
هنفترض انك عاوز تكتب كتاب .. بس مش عارف ازاي تكتبه او حاسس الكتاب ده كبير جدا
هتبدأ تقسم الكتاب لفصول ومع كل فصل هتعلم صح على الهدف .. ف بكدة انت بتقسم اهدافك لاهداف واقعية عشان تكون اوضح وتقدر تحققها بطريقة اسهل وده اللي انت هتعمله مع اهدافك وطموحك .. لو انت مثلا طموحك عربية
-اكيد مش عاوزني اقسم العربية واشتريها كاوتشات واجمعها انا؟
ماهو فقرك ده هو اللي مرجعك ورا .. لا يا سيدي إنت هتكتب اول حاجة انك تلاقي وظيفة مناسبة بعدين تكتب انك تدخل جمعية والجمعية هتحط فلوسها مقدم عربية وهتسدد الباقي بالمرتب
او بفلوس الجمعية تعمل مشروع والمشروع هيجيب العربية وهكذا .. الفكرة انك كل ما قسمت الهدف لأجزاء كل ما بقى اسهل
فيه خطوات تانية بس انا شايف ان كده كفاية اوي
لإني حابب انك تقرا كل حرف وبتركيز
#عز_حاتم
