النهاردة هو اليوم الخامس لملخص كورس مدرسة الكاريزما والثقة بالنفس اللي بلخصه بطريقتي واللي كمان موجود على يوديمي و على قناة الزتونة لو حد حابب يشوفه وكمان هضيف حاجات من عندي ك عز قريتها في كام كتاب كده على مدار السنين اللي فاتت
حابب اقول في البداية ان الكاريزما والثقة بالنفس زيهم زي اي مهارة يمكن تعلمها والتدرب عليها ♥️
......................................
النهاردة هنتكلم عن الخطوة التالتة لزيادة الثقة بالنفس
الخطوة التالتة ديه هي في وجهة نظري اهم خطوة وهي ادرس نفسك
-ما انا مش موجود فالمنهج ههه!
بالظبط كده ديه اول حاجة فيك انك دايما مستخف دمك ومعتقد انك اعلى من البشر وانك عارف كل حاجة، بس فالواقع انت ثابت مكانك والعالم حواليك بيمشي اللي كنت سابقهم بخطوات سابقوك، عارف ليه؟ لإنهم درسوا نفسهم كويس وعرفوا امكانياتهم وبناءاً عليه اشتغلوا عليها وبدأوا يطوروا فيها.
او كام مرة كنت بتتعامل مع الناس ومع المجتمع ولقيت ان انت بنفسك اللي بتقلل من قيمة نفسك. انت مش قليل بس انت مش مدرك لإمكانياتك كويس.
الحياة عامة ليها خطوات معينة لازم تاخدها وبعدين تبدع بخطوات زيادة لكن لو مأخدتش الخطوات ديه عمرك ما هتعمل اي حاجة واول خطوة فيهم هي انك تدرس نفسك.
عاوز اسألك سؤال بما انك شخص دمك خفيف يعني؟
-اتفضل ماهو بقى امتحان كيميا.
اولا انا مبحبش الهزار ثانيا سؤالي هو كام مرة حققت حاجة او عملت حاجة او حتى جبت جون في لعب الكورة وقولت والله مش قصدي .. ديه جات معايا كده، ده حظ مبتدئين، لا ده حد ساعدني، لا ده كذا كذا؟
-والله على طول بقول كده.
ديه حاجة وحشة جدا انت كده بتنقل ليك واللي حواليك طاقة سلبية عنك بتخليهم مقتنعين انك متقدرش تكرر اللي انت عملته وكمان بتخلي نفسك مقتنع انك متقدرش تكرره، مع العلم ان اي حاجة انت قدرت تعملها مرة هتقدر تعملها الف مرة لو اتدربت عليها الفكرة انك اقنعت نفسك انه حظ وانك متقدرش، ده اول شيء في دراستك لنفسك لازم تعرف انت تقدر تعمل اية، لازم تفهم ان انجازك مهما كان صغير بالنسبة لطموحك فهو خطوة للانجاز الاكبر وانك طالما مشيت خطوة يبقى تقدر تمشي كيلو.
راقب نفسك وانت بتتكلم عن انجازك وانت هتقدر تدرس نفسك وكمان راقب افكارك وراقب كلامك اعرف كويس مميزاتك واعرف كويس عيوبك ولو محتار ممكن تسأل حد قريب منك. التدريب ده هيعلي ثقتك بنفسك جدا . وهتشوف نفسك قادر تعمل كل حاجة.
الخطوة الرابعة وديه خطوة مهمة جدا هي فكرة التعاطف مع النفس او حب النفس
-حب النفس! ده بمناسبة الفلانتين وكده؟
لا يا خفيف، حب النفس ده اهم شيء بعد جلد الذات اللي بتعمله في نفسك كل يوم ومبتعرفش تنام منه، فيه شاب عنده عشرين سنة يجيله الضغط وارق من التفكير ؟
-حقيقي انا فعلا مش بعرف انام من خوفي اني محققش حاجة.
بص هو فيه ٣ انواع من جلد الذات
جلد الذات بسبب الاحلام الكبيرة، بتحط لنفسك طموح كبير جدا وطول ما انت بتكبر فالسن ولسه بعيد هتقعد تجلد ذاتك وتقول وانك لسه بعيد، بس عاوز افهمك ان طول ما انت عايش هتفضل تجلد ذاتك وعمرك ابدا ما هتوصل لمستوى الرضا، ف انت لازم تهدى شوية وترضى عن حياتك وعن نفسك ومتحملش نفسك اكبر من طاقتها
النوع التاني: هو الاخطاء
تقعد بليل كده على سريرك تقول ياااه ده انا رميت شنطة محمود واحنا فالحضانة وكان فيها كتاب دين، انا ازاي اعمل كده وانا اكيد لو دلوقتي مش هعمل كده.
وهي ديه الفكرة ان انت مش ساعتها .. لازم تبقى فاهم ان الماضي مش هيتغير بس الحاضر هيغي مستقبلك، ف لازم تطور عقليتك انك لو حصلك نفس الموقف او موقف قريب تتصرف صح وتبقى اتعلمت الدرس ومترميش الشنطة من غير ما تشيل كتاب الدين.
النوع الثالث: هو البحث عن الكمال
كلنا نفسنا نبقى كاملين، وكلنا نفسنا ميبقاش عندنا اخطاء بس صدقني كلنا بنغلط، لو مش فالعلن يبقى فالسر. الفكرة مش اني بقولك اغلط، لا ابدا انت صلح من نفسك وحاول تكون انسان افضل بس لو غلطت غصب عنك! مفيش مانع ابدا انك تعتذر بس متزودش الاعتذار ولا تضغط على نفسك.
تعرف ايه هي اجمل سمكة فالدنيا ؟
-السمك الدهبي ده
طب عارف ليه هو جميل؟
-عشان بيعتذر؟
لا عشان بينسى بسرعة، ذاكرته الضعيفة بتخليه ياكل طحالب بتأدي لاصفرار لونه.
لو مكنش بينسى مكنش هيبقى جميل ♥️
وفالنهاية انا حابب انك تقرا كل حرف وبتركيز
#عز_حاتم ♥️
