تبقى قاعد في أمان الله تلاقي صاحبك النورم بيحاول يقنعك إنه عنده شيزوفرنيا وتعريفه للشيزوفرنيا
ويقعد يقولك بقا أنا عندي شخصيتين، يعني ببقى قاعد فرحان وفجأة تلاقي شخصيتي التانية طلعت وقاعد معكنن بقا ومخنوق..
وساعات ببقا قاعد رايق كدا عادي وفجأة تلاقيني متعصب جامد، ومش عارف اتخلص من الشخصية التانية دي..
وعمال بقا أي، يبدع.. اللي هو خمس دقايق وهنلم الورق:
ببقا قاعد متعصب وفجأة تلاقيني بضحك، ساعات ببقا مخنوق ومبعيطش علشان شخصيتي التانية شديدة ومبيهمهاش حاجة.
حلوة الهبدة دي؟ حلوة وهتجيب -20 من 20..
فلا دا صديقك الصيوحة ملناش دعوة بيه.. طيب بيعد عن الهبد اللي حصل دا في حاجة لفتت انتباهي: هو إنه عبر عن مرض الإنفصام بالفظ الشيزوفرنيا ودا غلط، لأن الفصام هي اللي معناها الشيزوفرنيا
حمادة هلال بيمسي عليك وبيقولك متقلدنيش تاني.. إنت عبيط يسطا
لا يسطا مش عبيط ولا حاجة إنت بس اللي مستوعبتش.. الفصام غير الإنفصام.. في واحدة بالنون والتانية من غير النون
إنما قصة...
بص هفهمك. .
في فرق كبير بين الأنفصام والفصام..
الفصام عبارة عن اضطراب ذهني
بينما الإنفصام اضطراب نفسي
الفصام: واللي هو يُطلق عليه الشيزوفرنيا.. وركزلي هنا، اللي مفهوش تعدد شخصيات هو الشيزوفرنيا أو الفصام، ودا اضطراب عقلي حاد المريض فيه بينفصل عن الواقع بالكامل وبيصبح الواقع بالنسباله خيال، هلاوس كتير أوهام أكتر ضلالات أكتر وأكتر.. ودا بيأثر على طريقة تفكيره وسلوكه وتصرفاته وتعبيره عن مشاعره وأفكره مع الناس التانية
بينما الانفصام اللي بالنون: بيتقال عليه اضطراب الهوية الإنفصامي، أو اضطراب الشخصية المتعددة فبيتعرف على إنه واحد من الأمراض العقلية عفاني وإياكم الله كأنه شخصين منفصلين مختلفين تمامًا..
المرض دا في المطلق بيكون مرتبط بالذاكرة.. بيخليها قصيرة ومعتمدة على تذكر المعلومات عن أحد الشخصين.. وبالتالي بيعمل تفكك في أفكار الشخص المصاب وفي ذكرياته وأفعاله وتصرفاته
مين هو مريض الفصام:
دا واحد عنده لامبلاة كبيرة شويتين معندوش تنظيم وحيد حبتين.. حاجات كدا هتحسها عندنا كلنا.. لكن في حاجات بتفصله عننا..
أولهم الهلاوس، هلاوس سمعية وبصريبة: مش أحيانًا بتبقى قاعد وتسمع جرس البيت رن أو والدتك بتناديلك مثلًا.. بتحصل بشكل قليل جدًا.. صح؟
هو لا الموضوع بيتطور معاه لدرجة إنه بيكون عايش في عالم خيالي بالكامل نوعًا بيكون شايف ناس مش موجودين أصلًا وسامع أصوات وهمية تمامًا، وبيتخيل مواقف لا بينتج سيناريوهات وهمية ومعقدة بالكامل شوفت فيلم اسف على الإزعاج بتاع أحمد حلمي.. هو كان متخيل وجود ابوه وحبيبته وحوارات وأحداث وليلة طويلة كدا.. دا المادة الخام لمرض الفصام
أحيانًا بقا نفس المريض دا بتهب منه ويتخيل إن عنده قدرة خارقة ومحدش يقدر يتحداه.. وساعات تاني بيحث إن في حد مقيده وبيتحكم في أفعاله وكلامه وبيأمره باللي لازم يعمله.
في اعتقاد كبير حبيتن عن مرضى الفصام إنه ناس حركتهم كتيرة ومبيبطلوش هري.. هو نوعًا ما صح بس مش قاعدة لإن أحيانًا مريض الفصام بيكون شخص هادي وبيكون قاعد في مكانه لفترة ويلة جدًا بتوصل للساعات أحيانًا، وبيكونوا عصبيين حبيتن وأحيانا بيكرورو حركاتهم.
واحدة كمانمن ابتلاءات مرض الفصام هو اضطراب الكلام والأفكار: من سمات مرضى الفصام إن تركيزه بيكون منعدم وأحيانًا بينتقل من موضوع للتاني من غير وجود رابط أو تسلسل منطقي للأفكار.. وساعات بتلاقيه بيتكلم جمل وكلمات مش مفهومة..
مريض الإنفصام:
بيكون عنده اضطرابات في الهوية الشخصية..
يعني بيكون عنده بالميت خالص شخصية تانية جنب شخصيته الأساسية.. وأنا قاعد بسرش في الموضوع دا لقيت أحد المواضع بتقول إن في مرضى بيوصل عدد الشخصيات بتاعتها ل 100 شخص.. لكن للأسف الموقع كان لا يُعد مصدر موثق.. ومكنش حاطط مصدر للمعلومة دي.. لكنها جملة لفتت إنتباهي فحبيت أقولهالك..
تبعيةً للموضوع دا بيظهر مشكلة في الذاكرة.. عمليًا دا شيء منطقي، لإن شخصية الأساسية منفصلة عن الشخصية التانية فالأحداث اللي الشخصية التانية بيعملها عقله بتاع شخصيته الأساسية مبيحضرهاش ومبيعرفش عنها حاجة.. هو ممكن يشوف أدلة تثبتله إنه صاحب الفعل دا، لكن ذاكرته بتقوله ما واضحة يعني إنها فوتوشوب.
بمناسبة الذاكرة.. من الأعراض اللي بتظهر على الشخص المصاب "بضطراب الهوية التفارقي أو اضطراب تعدد الشخصيات أو الانفصام..
من الأعراض دي فقدان الذاكرة الإنفصالي: ودي حالة الشخصية المصابة بيها مبتفتكرش المعلومات المهمة عن حياتها.. وأحيانًا المعلومات الشخصية وساعت بتضمن هويته نفسها.. في بعض الأحيان بيكون النسيان متعلق بحاجات معينة بس.
خد عندك وقول هات..
هات
خد.. افتقار القدرة على تمييز الوقت.. ودي من أسمها مش هنتكلم عنها علشان واضحة.
أحيانًا بتكون من الأعراض دي فقدان الوعي وأحيانًا بيكون صداع شديد وفقدان ذاكرة مرة كمان لإن دي واحدة من أهم الأعراض اللي بتكون موجودة
زيد عليهم عدم الثقة بالنفس.. وأخيرًا عدم القدرة على تمييز الأشياء..
ولحد هنا أكون خلصتلك ملخص سريع عن الفرق بين الإتنين.. متنساش تشترك في القناة علشان هنزل موضوع مفصل لكل حالة منهم.. ومتنساش تعمل لايك للفيديو وكومنت بملاحظاتك علشان أطور من نفسي.. وسلام.