الحشيش وأبو أصالة، والطيارة، الردياتير، الدوبامين والبهججة، وحاجات تانية..
مبدأيا كده البوست مكلبظ وهيسلطنك نفسيا كإنه چـوب، فشمرلي بوكسرك الجميل، ناولني الحديدة، سك باب القهوة ولملي الكارتيلات دي من الرجالة، واديني ودنك بقى ويلا بينا ..
إيه؟
الحشيش بكل اختصار مادة نباتية بتنتجها الماريجوانا أو الحشيشة المصرية اللي اسمها عند أهل الفرنجة Cannabis
الردياتير؟
شوف يا سيدي جسمك وخاصة دماغك جواه مراكز نفسية وحسية متداخلة وربنا خلقك برادياتير أو مبرد طبيعي عشان الموتور بتاعك "دماغك"
الراديتير ده اسمه endocannabinoid
من الآخر كده حشيش رباني داخل جسمك
ده وقت اللخبطة بيشتغل بطريقة معقدة ومتداخلة الناتج بتاعها تغيرات في الجسم تخليه يهدأ ويتبسط ويفرز دوبامين عشان تحل مشاكلك ويفكرك بالأكل عشان متنساش نفسك ويخليك تستمع بالتخيلات الحلوة مع مراتك ويزودلك الطموح ويحرق السكر في جسمك ويخفف آلامك بعد يوم طويل ومتعب.
الحشيش بقى بيحتوي على مركبات كتير الأساسي فيها هو
الـ THC وده شبه الردياتير جوه جسمنا، لكن الردياتير الرباني مضبوط على جرعة محددة ومتوازنة وعبقرية، اللي هو لما تسخن من صوت مديرك أو قرف الدنيا يبرد هو السخونية دي ويصحصحك، ويخليك واعي، لما يجيلها الدورة الشهرية وتتخانق علشان في طماطماية أكبر من طماطماية وهي عايزه تنقي اتنين في نفس الحجم لطبق السلطة، وانت يكون عندك ضغوط حياتيه أقلها أكبر من مشاكلها هي كلها على بعضها، إلا إن دماغك واعي وفايق انه ميطلقش، ويهدٍّيك كده ويخليك تلاجة علشان الحياة تستمر
الحشيش بقى بمركب الـ THC هيدخل بجرعة عالية جدا، فيفصل كل العدادات في جسمك ووعيك ويعيشك حالة مذهلة من الانبساط، وبمجرد ما ينتهي أثره تحصل لك انتكاسة وتدخل في اكتئاب، واكتئاب حاد في بعض الحالات.
يبدأ الدوبامين الكتير اللي اتفرز بدل ما يفكر في حل لمشاكلك ويحفزك، يبدأ يفكرك بشعور اللذة بتاع الحشيش وانبساطك بالسيروتونين جارته الحلوة وعاوزك تطلع سيروتونين كتير عشان يتبسط هو ويخليك تفكر تجيب حشيش تاني منين وتقع في دايرة الادمان
لا ويدخلك في دايرة ألعن، وهي فقدان جسمك
الدوبامين هو مايسترو الجسم ومنظم حركاته زي الفنانين والموهوبين واللاعبين كده، وزي العم أسيم مثلا 😑
مجرد ما يتفرغ للحشيش يسيب مهمته الأساسية ويبدأ جسمك يفقد معظم مهارته حتى الكلام والذكريات ودماغك يفوٍّت، وأخيرا تدخل في خناقة ما بين الدوبامين والسيروتونين قد تنتهي بفصام في الشخصية أو إضطراب عقلي
كل ده عشان الراديتير مش عاجبك وصوت المكنة عالي وحضرتك عاوز تكتمه بدل ما تسيبه يكمل شغله
في بقى كارثة تانية مرتبطة بالزفت ده
إنه بيخليك تطلع رغباتك المكبوتة الحبيسة، والخيالات غير السوية المريضة، اللي وعيك الطبيعي اللي ربنا خلقه كان بيحبسها ويفرملها، وده الجزء اللي بيشتغل عليه منتجوا المواد الإباحية لعائن الله عليهم تترى، زنا محارم، مشاركات جنسية، ممارسات حقيرة، اغتصابات، وغيره كثير.. ده كله لما حضرتك كنت بتتفرج عليه كنت بتعتبره مجرد مادة رائجة لا تتعدى كونها كده وعقلك بيقول لك ما بينك وبينه إن مستحيل انت تقع في حاجة شبه كده، لكن بتبقى مادة رائجة لإنك مش هتعرف تعملها ومعلوم يعني إن المرغوب ممنوع والممنوع مرعوب وكده، ف بتتفرج، بس عقلك بيخزن وبعد شوية بيبدأ يستسيغ وبينبسط وده هو الاختراق العقلي لك، اللي الكلاب دول بيجيبوا دكاترة علم نفس وبروفيسيرات علشان يشتغلولهم على الجزئيات دي، لكن المهم إن وعيك بيفرمل كل ده إلى حد ما.. جيت انت فصلت زرار الوعي فيروح ده كله يطلع، تعمل زنا محارم وتعمل ممارسات محرمة مع زوجتك، تتخانق وتقتل وتشتم، وتخسر ناس بدون سبب منطقي، وخيالاتك المريضة عن ناس تانية تظهر، لو اتكلمت عن نفسك تقول أسرار وفضايح، لذلك الشخص اللي بيتعاطى الحشيش بيوصم بعدم المروءة .. لإنه بيفقد أغلى شيء ربنا ملكه إياه .. الوعي
الجزئية دي بتنقلنا بقى لمشاكل الحشيش مع الجنس
ضعف انتصاب 🙂
انخفاض في الطاقة البدنية والوظائف الجنسية.
نتيجة حدوث خلل في التقدير الزمني عند المتعاطي، هو يفكر نفسه عنتيل وبقاله ساعة راكب، ويرضى عن نفسه تماما، والحقيقة غير كده.
نتيجة لغياب الوعي، تصرفات جنسية محرمة وناقلة للأمراض.
يسبب نقص في الطاقة الليبيدية المسؤولة عن الرغبة الجنسية، وبسبب سيطرة حالة الإشباع والاكتفاء على الجهاز العصبي تقل لحد ما تنعدم الرغبة الجنسية، ويدخل في دوامة الكيميا، ف تلاقي الشخص ده ياخد صيدليه قبل ما ينط.. مع إنه لو تعامل طبيعي زي ما ربنا خلقه ورمى كل ده في الزبالة هيبقى زي الفل .. لكن الله المستعان.
طبعا الحشيش ليه أثر سلبي على نسبة الحيوانات المنوية، وبيسبب اضطراب في الهرمونات اللي بتعمل مشاكل في الخصوبة والقدرة على الانجاب.
طبعا انت خلاص استنتجت فوائد الحشيش المذهلة
كده فهمت كويس إنه بيفصل العدادات، وكإنه بيملك زرايز في جسمك بتخليه في أجمد حالاته..
بضغطة زر الصداع يروح
وضغط الدم يتظبط
ألم العيون يختفي
ألم المفاصل والعضلات بح.
قولونك يتهد ويبقى راجل محترم ويبطل زيطة ودربكة
لو في ترجيع وغثيات بالسلامة يا حبيبي بالسلامة
ده طبعا هيخليك جعان، ويفتح نفسك على كل حاجة
الضغوط النفسية شكرا وداع يا دنيا وداع على اللي باع ومكملشي
مزاجك رايق وعال العال وراكب طياره ومدلدل رجلك من قُمرة القيادة، وشايف العالم كإنه مرحاض ولما بيجيلك إحساس إنك عايز تخرج فضلاتك على العالم بأسره هتعمل كده بكل بساطة..
وبقى لونه وردي 😀 العالم بتاعك 😀
والجنس بقى جميل كده ومزاجه عالي، والأداء اتحسن، والإفيهات الجميله ظهرت، ويا سلام بقى لو هي كمان مِشيَّرَه معاك السيجارة، ف كده الجو الجميل مكتمل.. لكن ده كله مؤقت وغير حقيقي، وانعكاسه على المدى مش هقولك البعيد بل القريب سيء جدا وسلبي وقاتل بشكل مريب.
البغاشة علشان طولت عليكم
حبيب قلب اخوك والله، ربنا خلقك طبيعي وعزة الله وقدرته، خلقك متوازن وجميل، أي مخالفة لسنة الله الكونية في خلقك وجبلتك مُهلكة ومدمرة وإن ظهر لك عكس ذلك في الوقت الحالي، ربنا حرم الحشيش ونقلت دار الإفتاء المصرية فتوى تحريمه وهي الجهة المنوطة بالفتوى في بلدنا، وأنا هحط لك رابط الفتوى في التعليقات.
الحشيش مدمر وبيخلي مواردك متجهة لاتجاه واحد بس وهو كيفك، وده هيدمر علاقاتك الاجتماعية، ووارد جدا يكون سبب في دمار بيتك، لإن جسمك هيتخانق معاك علشان الجرعة، بتدمر نفسك بنفسك، وبتخالف جبلة ربنا اللي جبلك عليها، بالله عليك ارجع لأصلك الطبيعي الجميل اللي ربنا خلقك عليه .. روح اتعالج لو وصلت لمرحلة الإدمان، وعالج نفسك لو لسه على البر ووقف الكارثة دي..
طيب انا هقولك على حاجة يا قلب أخوك، هل ربنا " حاشاه حبيبنا ومولانا " ممكن يخلق الإنسان غير مكتمل، وتكون حالة كمالك في موارد خارجية؟ حاشاه.. بل خلقنا على أحسن تقويم، وأعجز العيون القلوب والأفئدة بصنعه الكامل جل وعز.. والمكملات التانية اللي تبسطنا عملهالنا أسلوب حياة وأمرنا نعملها زي الزواج والجنس الحلال، والحاجات المندوبة زي الخروج والانبساط وقعدة الصحاب الجميلة، اوعى تحول مكارم ربنا دي كلها لبلاوي سودة تدمرك وتدمر آخرتك بإيدك وتنزع بيها وعيك اللي ربنا ميزك بيه عن باقي الكائنات ..
والحمد لله رب العالمين
نُقِلَ من جروب شكة دبوس
لـ اسيم