النهاردة هو اليوم التالت لملخص كورس مدرسة الكاريزما والثقة بالنفس واللي موجود على يوديمي و على قناة الزتونة وهضيف حاجات من عندي ك عز قريتها في كام كتاب كده على مدار السنين اللي فاتت..
النهاردة هحكيلكوا قصة صغيرة اتمنى تركزوا فيها كان في مرة بعد الحرب العالمية الثانية في اوروبا ف صاحب المصنع كان ظالم جدا والفترة ديه كانت فترة اشتراكية صعبة جدا، ف العمال حبوا يعترضوا عالموضوع فإختاروا واحد منهم انه يقابل صاحب المصنع و يعرض عليه مطالبهم، صاحب المصنع اول ما قابله رفض كل مطالبه وقاله كفاية جدا اني قعدت معاك وليك الشرف ان شخص عظيم زيي يقعد مع حد زيك،
العمال فالمصنع اضربوا عن الشغل وسابوه وراحوا اتجمعوا واختاروا حل بسيط جدا انهم هيجمعوا فلوس ويشتروا مواد خام اكتر عشان يشتغلوا بيها، بس هيتشغلوا بيها ازاي!، وهيجيبوا الالات منين والمكان فين؟.
راح الولد اللي قعد مع صاحب المصنع جاله فكرة.
جمع كل الفلوس اللي معاه واشترى بدلة ونضارة والطاقية الكبيرة ديه بتاعة الاقطاعيين وجزمة جديدة وقص شعره زي الاغنياء،
وراح للراجل صاحب المصنع اللي قابله بترحاب كبير جدا غير المرة الاولى اللي مرضاش يسلم عليه ومبصش ولا مرة عليه وكان قرفان جدا،
فالولد ده عرض عليه فكرة انه هياخد منه المصنع ويدير المصنع كامل وهيجيبله نفس المكسب وبتكلفة اقل،
صاحب المصنع اتبسط جدا وعلى طول وافق،
فالولد ده رجع للعمال وبقى مديرهم والعمال اشتغلوا عالمواد الخام اللي هما اشتروها في المصنع بتاع الراجل وباعوها لشركات تانية والمكسب لصالحهم، وعملوا مكسب كويس جدا يعوضهم عن مرتبهم والراجل صاحب المصنع تكلفته بقت اقل وبيطلع نفس المكسب.
-مش فاهم قصدك يا استاذ عز؟
بص يا سيدي الفكرة هنا ان عامل المصنع ده غير جلده وغير حياته عشان يوصل لفكر صاحب المصنع واللي هو درسه من اول مرة عشان كده حقق اكبر استفادة.
والعمال استفادوا لما ضحوا بكل الفلوس اللي معاهم واشتروا مواد خام.
وصاحب المصنع هو الوحيد اللي خسر لإنه مبصش لباقي الناس
-وصاحب المصنع خسر اية؟
خسر الالات اللي هتتهلك في شغل اقل وايجار المصنع وكل ده ..
تعرف بقى انا حكيتلك ديه ليه وده اية علاقته بالكاريزما ؟
-لا حقيقي وانت عمال ترغي وانا مش فاهم؟
ارغي؟ ماشي يا عم بص بقى هجاوبلك السؤال التاني علاقة القصة بالكاريزما، الكاريزما ياسيدي هو اللي عمله العامل عشان كده جذب صاحب المصنع وبان واثق في نفسه وبان صريح وكمان بان متعاطف وذو رفاهية، قدر يجمع كل الشخصيات عشان يبين سيطرته على صاحب المصنع
اما بقى عن حكيتلك ده ليه؟
لإن ديه اشهر حيلة فعلم النفس مش الحيلة اللي عملها العامل ..لا حيلة القصة ..
القصة خلتك تتشد ليا وقدرت الفت انتباهك ..
اجزاء القصة بتتكون من اية ..
1 البداية والواقع
الواقع اني خليتك تصدق بالقصة لما قولتلك تاريخ ومكان القصة فإنت لوحدك ربطت القصة بالعامل المطحون في اوروبا فالوقت بعد الحرب
2 تصاعد الحدث
وده لما العمال زعلوا على مرتباتهم وصاحب المصنع رفض يقابلهم
3 فك العقدة او حل المشكلة
وهنا انا ربطت البطل بيك انت وحسستك ان كل واحد يقدر يكون شخص كبير جدا لو بس حسبها صح وضحى بحاجة قصاد التانية
4 العبرة
القصص اللي بتنتهي نهاية مفتوحة بتخلي اللي بيسمعك يزهق منك، لازم تحطله فالاخر نهاية .. لازم تحط عبرة .. لازم تحط فكرة القصة وتكون قريبة من الموضوع اللي بتحكوا فيه
وأخيراً بقى انا شايف ان كده كفاية اوي النهاردة لإني حابب انك تقرا كل حرف
#عز_حاتم
