ياللي سيبت الشوق يزورني
وأنت كنت لقلبي سايب
ليه بتبعد يعني قولي
قلبي من بعدك دا شايب
ليه بتبعد بس قلبك
م أحنا كنا أتنين حبايب
كنت روحك كنت قلبي
صعب أنام ونا قلبي غايب
ليه بتهجرني ورميني
بعد م اتعلقت بيك
كنت أقرب حد ليا
كنت شايفة الجي فيك
كنت لما تحس ضعفك
ببقى جنبك بحتويك
كل حبك مش نصيبي
كل حبي بحاله ليك
بيعني عادي ورغم نقصك
قلبي عايزك مشتريك
قولت كل دا كله ليه
قلبه متحركش خطوة
غرّه كوني مسكت فيه
حس ليه بنفوذ وسطوة
غيّر الأفعال ف لحظة
عشت جنبة ف نار وحيرة
كنت بتلكك وبدّي
من مشاعري حاجات كتيرة
بس كان زي شخص خامل
فاقد الإحساس بغيرة
فوق ده كله زاد ف بعده
قالي أمشي مش هكمل
جيت حاولت ألم قلبي
بس كان الوقت فات
جالي غيره حاببني فعلًا
بس كان أحساسي مات
كنت بتعب حاسة ظلمه
كنت بظلم فيه بجفافي
جيت حاولت أكتب له مرة
كنت زي أقلام ولكن جف جافي
ع السطور ولا حرف لسة
عدى وقت مفيش كلام
أكن كل كلمة حلوة
كت نصيب إنسان جبان
فوقت بعد شرود للحظة
تايهة عايزة شعور أمان
فجأة صوت قاطع سكوتي
قال وحشتك ؟
لسة ماشي الصبح لكن
زي مكون سبتك زمان
مش غريبة أمشي ورجع
وأنتي زي منتي ف مكانك؟!
ولا يعني عشان جميلة
خايفة تتحسدي فجمالك؟
بص جامد جوى عيني
وبتسملي وقالي مالك؟
قولتله مش قادرة أكمل
قالي ليه في إيه يعيبني
أنتي مفكيش شيء يعيبك
قولتله لاء ظلمتك
قالي جنبك مش هسيبك
قولتله أنت بتأذي نفسك
قال لكنّي هكون حبيبك
قولتله مش قادرة أحبك
قال وممكن أكون نصيبك
جربي وأنا جنب منك
يمكن الأيام تحرك حاجة فيكي
والشغف بالوقت يرجع وابقى ليكي
قالي حاولي وقلبي جنبك
وقت خوفك هحتويكي
قال بحبك مش هبيعك
أنتي ليا ومشتريكي
جه كلامه ف ودني خدني
شدّني لكام ذكرى فاتت
شفت هو فنفسي يومها
وشوفتني القاسية اللي سابت
فوقت بعد م كت دموعه
جوى عينه وبيدريها
رغم ده كت نظرة طاهرة
وشوفتني وأنا حلوة فيها
وبتسمت وبتسامتي
كت كفيلة لسد جوعه
قولت حبّاه وبإديا
قومت ماسحة إليه دموعه.
#زاهر عصام.
#قصيدة: فرصة تانية.
