الشرع محللش أربعة

طيب أنا جي الغي إثارة الجدل بإني أثير الجدل.. موضوع النهاردة تحت عنوان بيعنيه بشكل شبه حرفي "الإسلام محللش أربعة"

عينك أوسعت، بوقك اتفتح على آخرة.. مش مشكلة تعالى نفهم بالراحة قصدي أي وإي حكاية التعدد دا..

الأول تعالى أكلمك عن حاجة أسمها الذنوب المشتركة (أنا اللي سميتها كدا)

يعني إي الذنوب المشتركة؟ أنا أقولك.. يعني ذنب علشان يحصل بيشارك فيه أكتر من شخص.. مثلًا شرب الخمر.. 

دا ذنب بيشيله أكتر من شخص إلا في حالة واحدة هنذكرها بعدين.. بيشيله اللي جاب المكونات (بغرض صنع الخمر) يعني جاب مكونات صنع الخمر وفي نيته هنعمل خمرة.. واللي بيصنع الخمر نفسه مرورًا بالي هيبيعه نهايةً باللي هيشتريه ويشربه.. أي أن كانت الدايرة فالمقصود أتنين بيتشاركوا الذنب دا.. الحالة اللي بقول عليها هو إنك تجيب مكوناتك وتعمل لنفسك وتشرب.. وبنوضح بتفاصيل ملهاش لازمة علشان الجماعة الفيمنست الأندر إيدج خنقوني بقلة فهمهم.. 

طيب فهمنا يعني إي ذنب مشترك، إي علاقة دا بالتعدد؟

أنا جيلك في الكلام تعالى نشوف بس إي اللي يثبت إن التعدد القرآن موافق عليه ومبيحه عادي..

(وَإِنْ خِفْتُمْ أَلَّا تُقْسِطُوا فِي الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا) النساء/3.

طيب وإي يخلي التعدد مش حلال: (وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ) نفس السورة.. وفاهم اللي هتقوله قبل تكمل، تعالى بس نفهم واحدة واحدة اللي عاوز أقوله..

عندك سؤال أخير: في نفس النقطة: لي النساء مش مُباح ليهم التعدد؟ دا سؤال ساذج من طفلة مينفعش واحدة متزوجة عاقلة تسأله.. لكن لنفترض إنه اتسأل.. سيبك من كل حاجة.. إن أختلط ماء الرجل ضاع النسب.. مس هنعرف الواد دا ابن مين.. ومن هنا تم كسر الروابط بين الآباء والأولاد، بعيد بقا عن مسؤليتها في تولي أمور أزواجها، هي هتكون مجبره تقوم بواجباتها تجاههم زي ما هم مجبرين يقوموا بواجبتهم تاجههن.. غير طبعًا الأمراض المصاحبة وليلة طويلة كدا أنا مش هتكلم فيها لأنها مش منطقية بصراحة يعني إنكم تسألوا عليها.. 

نرجع لسؤالنا الأول

ربنا قالك متاح لك الزواج من اثنين وثلاثة وأربعة بشرط أساسي لا يمكن كسره.. ألعدل بينهن...

وشرط تاني مهم تكون مقتدر ماديًا بإنك تجيب مهر وتصرف عليهم بدون تقصير وعلى ولادك...ألخ، في ناس مقتدرة وتقدر تحقق الشرط دا لكن نشوف الشرط المهم اللي أتذكر في الآية.. "العدل"

ربنا في نفس الصورة قالك (وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ) بعض من جمهور الفقهاء وربما الأغلب إن مكنش كلهم فسروا الآية بإن المقصود بيها العدل في المشاعر: وهو شيء ليس بيد الرجل القيام به...الخ

هفترض إن دا تفسير كافي وافي للآية مؤقتًا ونرجع نفكر تاني من الأول.. ونفهم بالراحة..

إي الحكمة من التعدد في الأساس؟

الأول حابب أكد إني مش بقول علشان ميخونهاش وبتاع.. الخاين خاين ولو متجوز 10 هيخون برضو ملناش دعوة بالنقطة دي رغم إن فيها تفصيل.. أنا ببص في مراية تانية.

أولًا العرب قديمًا كانوا يتفاخرون بنسلهم وتناسلهم... ودا كان بند لو اتلغى هيحطم حجر الأساس في العروبة ولا يمكن كسره لي لإنه لا يجوز كسره.. خصوصًا إن بند مبيعملش أمراض متناقلة أو أضرار جسديه، للقائمين به.. والأصل في الذنوب هي التي تضر الإنسان أو البيئة مما تؤدي لضرر الإنسان بشكل أو بآخر.

طيب يا عم إحنا مش عرب... جيلك في الكلام، من مصلحتنا كـ "دين" إننا نتكاثر ونكون عدد كبير، ومتقوليش لو كترنا هناكل بعض وشغل الإقتصاديين اللي بنسمعه دا.. شوف الصين عندك أكبر شعب وأكبر أقتصاد، الفكرة في (الإدارة الصحيحة من الإنسان في استغلال موارد الإنسان مش أكتر)

ثانيًا فترات الحيض عند النساء من كل شهر، دي مقدور عليها لو الرجل شديد الشهوة، هيتخطاها بصعوبة بس هتعدي، لكن في حالة الولادة؟ 40 يوم يا مؤمن، دا رقم ضخم ودا وارد يوقعه في رزيله ممكنة، مش ببرله القيام بالرزيلة ولا الزواج، أنا بشرحلك حالات حدثت وواردة الأحدوث دي أسباب ساعدة على حدوثها.. وركز ساعدة.

 وشايفك يا حجة يا اللي هتصيحي وتقولي شهوة الإنثى أكثر وبتاع.. لا مش أكثر، الأعصاب الحسية أكثر، يعني مسببات الإثارة أكتر عندك لكن مفيش مانع عند الرجل يكفيها بشكل يومي بدون أعذار، لكن ماذا عنكِ في فترات الحيض والولادة؟ ننتقل من النقطة دي بسرعة لإني بحاول أكون حريص في التفاصيل والمعلومات، لمراعاة حياء القارئ.

الرجال عرضة للحوادث والموت في أي لحظة، سواء من طبيعة عملهم، أو الحروب والجهاد، مما يؤدي على فقد التوازن وميزان التكافؤ بين الجنسين.. وزيادة ملحوظة في عدد الإناث... وحاجات كتير كدا تبيح إن الرجل منطقيًا يتجوز أكثر من واحدة عكس الإنثى مفيش منطق.

نرجع بقا في نقطة التشريع.. 

فاكر لما قولتلك الذنوب المشتركة.. ذنب بيقوم بيه أكتر من شخص وكلهم بيشيلوا الوزر مع بعض..

دا بقا الذنب المشترك الوحيد اللي بيشيله الرجل لوحده.. يعني إي؟

ربنا قال: "فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً" قالك عدد اللي يعجبك من النساء بس بشرط تعدل، لو خوفت متعدلش اتجوز واحدة بس.. ورجع في آية تاني وقالك: "وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ" يبني إحنا بنفهمهن بالعافية هنعدل بينهن؟

جمهور الفقهاء زي ما قولت فوق، قال المقصود بإستحالة العدل هنا هو عدل المشاعر، أكيد قلبك هيميل لواحدة أكتر من التانية، ودا شيء لا شأن لك فيه فبالتالي ربنا مش هيحاسبك عليه... طب ما تيجي نبص من زاوية تانية..

أنا جي أقولك تعالى نفترض زواجك بأربع نساء بيحبوا البطيخ وإنت حبيت تشتري ليهم بطيخ هتعمل إي؟

الإجابة سهلة هشتري أربع بطيخات.. لو الإجابة وقفت هنا تبقى إجابة ناقصة..

نكمل الإجابة: أربع بطيخات نفس الحجم.. كدا كاملة بس شوية، ولسه ناقصة..

هنجيب أربع بطيخات نقسم كل بطيخة 4 أجزاء بالتساوي ونجمع بطيخة تحتوي على جزء من كل بطيخة منهم.. لإن وارد جدًا بطيخة تكون مسكرة والتانية تكون مش مسكرة، وهي هنا هتحس بالبغيضة والكره والغيرة المفرطة، لو بطيختها طلعت مش مسكرة لإنها هتعتقد إنك منقي الوحشة ليها بس جايبها تقضية واجب وخلاص، لكنها واكلة عقلك وبلا بلا بلا أنثوي كتير.

وهو دا العدل على فكرة، هتجيبلهم نفس الحاجة مادم بيحبوها كلهم بنفس المواصفات..

العدل مش إنك تدي لكل واحدة فلوس قد بعض ودا وجه تاني من أوجه العدل.. العدل إنك تعمل أكتفاء متساوي عندهن.. يعني دي عاوزة فلوس، ودي عاوزة أكل، ودي عاوزة لبس، وطبعًا كل شيء وليه سعره، مع مراعاة تواجدك في تلبية طلبهن بدون ما يحسوا بالإنحياز، بمعنى متجبش لدي لبس وتقعدوا تقيسوه تخبطلي نص اليوم شوبينج وضحك وبتاع، وتروح للتانية تجبلها خاتم مثلًا فتقعدد معاها خمس دقايق وإسمي لبيت أحتياجاتهن الإتنين أهو.. دا إسمه تحايل على الله.. دا حرام، عامل زي أصحاب السبت كدا. 

من أوجه العدل: هو إنك تحسس كل واحدة فيهم إنها الملكة اللي فيهم، ولو بالكذب؛ ودا علشان تغلب على نفسك مشاعرك الحقيقية عند واحدة منهم.. حب براحتك، الباقي ميحسش بحاجة.. 

طيب خالفت القواعد، اللي إنت أصلًا مش هتقدر تحافظ عليها، وكدا كدا هتخالفها.. إلا النوادر جدًا، دي عاوزة مرحلة معينة من الإيمان.. هتشيل ذنب. ودا ذنب هتشيله لواحدك.. شوف هي قبلت تكون زوجة تانية وثالثة.. وإنت معدلتش، تشيل لواحدك، شاكرتك في صنع زواجه تانية، سابتك في عواقب الوقوع في ذنوب الزواج.. لواحدك..

يعني ربنا حط شرط شبه مستحيل تجاوزو وقال فيما معناه بلاش تتجوزوا أحسن ليكم إلا في الحالات الحرجة حقًا ومفيش حالات حرجة، هتشيلوا ذنب، دا حتى في الحالات الحرجة فيه ذنب وذنب ملوش عقاب أو كفارة ثابته، دا ذنب زي البورصة كدا سهم بيطلع وينزل حسب عدم عدلك وتوغلك فيه.. حالات حرجة زي إي؟

زي مثلًا إنت متزوج وبنت عمتك ملهاش غيرك حرفيًا حاليًا وبالتالي هتصرف عليها وهتعيشها معاك.. لا هنا لازم تتجوزها لإنك مش محرم، ووجودها معاك معظم الوقت هيدي مساحة للشيطان، مش هتتجوزها؟ متحطهاش في بيت قدامك 24 ساعة.. أصرف عليها من بعيد أوي..

دينيًا الشرع حلل أربعة، دينيًا بعدسة تانية، الشرع حذرك من إنك تتجوز أربعة علشان أخرتها معروفة ذنوب جارية...

#الكاتب_الرمادي

ــــــــــــــــــــــــــ

تعديل لتوضيح بعض النقاط

أنا لما اتكلمت قولت فكرة العدل صعبة وتكاد تكون مستحيلة بسبب قلة إيمان رجال هذا الزمان.. دا كان فيما معنا كلامي ولاز نحط تحت البند دا كام خط...

لما جبت مثل البطيخ عملت افتراض إن كلهم بيحبوا البطيخ وعاوزينه لوضوح الفكرة مش أكتر وبعد كدا ذكرت العدل تحت مش إنك تدي للكل نفس الحاجة لكن إنك تلبي إحتياجات الكل بالشكل اللي يرضي الكل.. زي ما رضيت اللي قلبك مال ليها.. هترضي بالظبط الباقي بالشكل المادي..

ولما قولت جمهور الفقهاء أغلبه قال كدا، فقولت إن المشاعر لا حكم لك فيها..

لكن نراعي تاني إني بتحدث عن الزمان قبل التحدث عن الحكم..

قلة إيمانّا في هذا الزمان هتخليك بدون إدراك منك بتظلم الباقي لإنك هتنصاع لمشاعرك زيادة عن اللازم هتخلي الجانب المعنوي يطغى ويأثر بالتالي على الجانب المادي

فأنا في أول المقال: والأساس من المقال، هو التحدث مع الجيل الجديد أو العصر الجديد من رجال الإسلام.. فهم بقوا بيستخدموا الدين غلط بالكامل بشكل ظالم لأنفسهم.. وبما إنك مش هتدرسهم علوم شرعية كلهم، فأنت محتاج تديهم زي أوامر كأنها ميري.. ناتجة عن بحث وفهم بدون خلل.. دا مش معناه إنهم ميفكروش طبعًا.. لكن دا حكم لحد ما يفكروا ويفهموا الأوامر دي كويس ويكتشفوا إن الأوامر دي خلاصة تفكيرهم.

اللي هو خلاصة الحياد عن الخطأ

هل تطبيق العدل صعب؟ اه صعب جدًا.. ومع ذلك يمكن تنفيذه ويبقى السؤال اللي محدش بيجاوب عليه.. اي هو العدل؟

وأنا جاوبت عليه بإيجاز في عدة أمثلة تدمجهم مع بعض تفهم الزيتونة، طبعًا هناك الكثير من الأوجه والأمثلة.. المفروض تكون فهمت الفكرة، فتدبر إنت بقا..