بكره.
بكره لما الموت ياخدني
ابقو سيبوا قلمي والمرايه
سيبوا كل حاجه تعبت معايا
سيبوا سريري وسماعاتي
سيبوا كل حاجه شهدت ف يوم
على وجعي وأهاتي
سيبوا فرحي لما بسمع غنوه حلوه
سيبوا ذِكرى مابينا حلوه
سيبوا عزوه ما بينا تشهد
إننا نتحكي ف رواية
بس أمانة بشيلها ليكم
اوعوا تسيبوا أمي للوجع
يملكها بعدي
صبروها بكلمه حلوه
أو حتى صوره ليا أو حتى غنوة
سمعوها صوتي لما كنت بضحك أو بغني
بس اوعوا تدخلوها اوضتي
هتحس بغيابي وغيباها عني
فهموها اني كنت بفضل دايما قافله بابي
علشان متحسش ف يوم غيابي
بكره
بكره لما الموت ياخدني
ابقوا بيت بيسيع صحابي
ابقوا افتكروا دايما اني ف جنة
هحليها وهزينها بشبابي
بكره
بكره لما الموت ياخدني عرفوا بابا وقلوله
اني هاجي كل يوم بروحي
علشان أشوفه وأزوره
بكره لما الموت ياخدني
عرفوا ماما وقولولها
أني هاجي كل يوم عشان
أبكي في حضنها
وتطبطب على قلبي
وأحس بحنها
بكره لمه الموت ياخدني
عرفوا خواتي كلهم
عرفوهم بشيء مهم
إني عيشت طول عمري بحبهم
وإني هاجي علشان أعيش وأكون في وسطهم
ويمكن اقول كلام كتير
مكنتش بقدر اقوله وانا وياهم ووسطهم
هيظهر علي شكل حلم أو يمكن كابوس
لما كانت دموعي مغرقه وشي
كان قلبي غرقان بين ضلوع الكابوس
لما كنت بفضل قافله بابي
لما كنت ببقه عايزه حد منهم يكون معايا
كانوا يسيبوني للوحدة
وأديني مت وسبتهم
والموت خطفني منهم
بقلم هايدي أحمد
نبض
